Klă klơ̆ng, čar drông leh 123.500 čô tuê hlăm ala čar lehanăn êbeh 1.500 tuê ala tač êngao, đĭ êbeh 8% mkă hŏng wưng anei thŭn êlâo. Adŭ đih mdei kah knar mâo hlăm brô 75%. Ti dŭm anôk đih mdei hlăm ƀuôn prŏng Ƀuôn Ama Thuôt lehanăn dŭm homestay djiêu êa mâo êbeh 90%. Hnơ̆ng hrui wĭt hlăm hdră hiu čhưn ênguê ti Dak Lak hlăm wưng anei mâo 62,5 êklai prăk. Hluê si Nguyễn Thụy Phương Hiếu, K’iăng khua Knơ̆ng bruă Dhar kreh, Mjuăt ktang asei mlei lehanăn Hiu čhưn ênguê čar Dak Lak, čar mâo lu klei găl čiăng mđĭ kyar hdră hiu čhưn ênguê lăn êa, mdei săn, hiu čhưn hlăm êpul êya, hiu čhưn mguôp hŏng bruă lŏ hma. Kyua wưng anei djŏ hlăm yan bhang, adiê hlơr kyua anăn hdră hiu čhưn snei jing klei mđing mrô sa mơ̆ng tuê hiu čhưn ênguê./.

Ƀri wưng mdei hrue 30/4 lehanăn 1/5 thŭn anei, ƀuôn prŏng Đà Lạt, čar Lâm Đồng mâo êbeh 170.000 gưl čô tue hriê čhưn, đĭ giăm 42% mkă hŏng wưng anei thŭn dih. Leh ksiêm dlăng dưi ƀuh, hnơ̆ng anôk jưh dăm ti dŭm boh sang jưh mơ̆ng 1-5 boh mtŭ hlăm dŭm hrue êgao mâo hlăm brô 80%, bi dŭm anôk mkăn hlăm brô 75%. Mbĭt hŏng bruă bi msiam wăl ƀuôn prŏng, mđĭ hĭn dŭm bruă hiu čhưn ênguê, hrue mdei thŭn anei ti ƀuôn prŏng Đà Lạt mkŏ mjing leh lu bruă dhar kreh, hlăp mbul iêo jak lu phung hiu čhưn mơ̆ng ala čar pô lehanăn mơ̆ng ala tač êngao.

Hlăm ênoh 170.000 gưl čô tue nao čhưn ti ƀuôn prŏng Đà Lạt hlăm wưng mdei msăn anei, mâo 162.800 gưl čô tue hlăm ala čar, lehanăn tue mơ̆ng ala tač êngao jing ƀiă, knŏng mil 7.200 gưl čô tue ƀiădah ăt đĭ 60% mkă hŏng thŭn dih.