Mkŏ mjing anôk hiu čhưn êpul êya, mnuih ƀuôn sang Đăk Răng, să knông lăn Đăk Dục, kdriêk Ngọc Hồi, čar Kon Tum kriê pioh mđĭ kyar lu mnơ̆ng dhơ̆ng jăk jiă kma knhuah dhar kreh mnuih Jeh Triêng. Ară anei mbĭt hŏng êpul tong čing, kdŏ čhuang, mnuih ƀuôn sang lŏ mđĭ lar bruă knă kpiê čeh, pơ̆k mñam, mkra kdrăp tông ayŭ, mkra mnơ̆ng dhơ̆ng hŏng kngan yua hlăm klei hdĭp grăp hruê, mnơ̆ng pioh dlăng, răng kriê sang roong djŏ msĕ si knhuah gru đưm, răng mgang knăm mơak hlue si klei hdĭp anak mnuih leh anăn yan ngă hma…

Hŏng klei gĭr mđĭ lar dhar kreh djuê ana, klei jăk siam dliê êa čiăng mđĭ kyar hiu čhưn ênguê, hŏng klei đru mơ̆ng bruă sang čư̆ êa alŭ wăl, ƀuôn Đăk Răng ngă djăp klei găl kơ hnơ̆ng kčah leh anăn mâo Knơ̆ng bruă sang čư̆ êa čar Kon Tum yap jing Ƀuôn hiu čhưn ênguê êpul êya.