Sui hŏng anei 70 thŭn, tĭ gŭ klei gĭt gai mơ̆ng Đảng, lĭng kahan lehanăn mnuih ƀuôn sang drei mâo leh Hdră mblah tŭ dưi Điện Biên Phủ “Kdrưh k’ang 5 krĭng lăn – kpư̆ mgei boh lăn”, bi rai klei ap gư̆ ktư̆ juă mơ̆ng phung Prăng lehanăn Mi. Klei tŭ dưi mơ̆ng hdră mblah anăn mjưh tuič leh klei bi blah, sua wĭt klei êđăp ênang ti Đông Dương. Hlăm wưng mâo klei êđăp ênang, Điện Biên Phủ jing sa kdrăn mblah jhat rai hŏng ƀoh ƀom, min, gru êka luič liê tuič hnơ̆ng. Vũ Văn Kiệm, mnuih ƀuôn sang ƀuôn hgŭm čar Điện Biên hdơr wĭt:

 Hlăk anăn wăl anôk gơ̆ huâng kduâng, jhat rai jih, knŏng mâo 3,4 boh sang tuil. Mơ̆ng Čư̆ A1 truh giăm wăl krah sang mnia amâo mâo sa anôk bruă ôh. Điện Biên Phủ dưi mtlaih êngiê leh ƀiădah mnuih ƀuôn sang ăt dôk ư̆ êpa, boh nik mnuih ƀuôn sang djuê ana ƀiă, sa hruê huă 2 blư̆ amâo trei”.

Dŭm thŭn êgao, bruă Đảng, sang čư̆ êa lehanăn mnuih ƀuôn sang dŭm djuê ana čar Điện Biên hdơr nanao kơ knhuah gru cách mạng, bi êdah nanao ai tiê Điện Biên Phủ jhŏng ktang hlăm hdră mđĭ kyar bruă duh mkra, hgŭm mguôp, msir mghaih boh jhat mơ̆ng klei bi blah. Mơ̆ng sa krĭng kdrăn mblah jhat rai, boh ƀom, min mtŭk mtŭl, bŏ hŏng êa k’hŏ hang lehanăn klang êrah mơ̆ng lĭng kahan lehanăn mnuih ƀuôn sang drei, Điện Biên ară anei mâo leh klei bi mlih prŏng, kpưn đĭ jing sa ƀuôn prŏng mrâo mrang, pral kdal, đĭ kyar lehanăn ñŭ kma kjăp hŏng kluôm ala. Lu hdră bruă prŏng dưi ngă lehanăn ba yua msĕ si tač êdeh phiơr Điện Biên Phủ mkŏ hŏng 2 krĭng duh mkra phŭn mơ̆ng ala čar jing ƀuôn prŏng Hà Nội lehanăn ƀuôn prŏng Hồ Chí Minh.

Ară anei, krĭng ƀuôn prŏng čar Điện Biên dôk pŏk mlar lehanăn mđĭ kyar hluê hdră čuăl mkă krĭng, čuăl mkă čar. Hdră čuăl mkă ƀuôn prŏng, čuăl mkă hdră rŭ mdơ̆ng dưi mđing, rơ̆ng klei kluôm ênŭm lehanăn nao êlâo, ngă tur knơ̆ng čiăng čih mkra hdră kčah lehanăn pŏk hdră duh bi liê rŭ mdơ̆ng, mkra, mđĭ kyar ƀuôn prŏng. Hlăm wưng 2020-2023, čar Điện Biên bi mklă hlăm brô 20 hdră čuăk mă ti krĭng ƀuôn prŏng boh nik hlăm ƀuôn prŏng Điện Biên Phủ. Truh ară anei, hnơ̆ng luôm hdră čuăl mkă kah knar mơ̆ng čar mâo hlăm brô 36%. Boh nik, mta kñăm truh thŭn 2025, čar srăng mtrŭt mđĭ hdră mlih mrâo kluôm, mjing boh kdrŭt hlăm hdră mđĭ kyar bruă duh mkra – ala ƀuôn, mđing djăp ai dưi, klei mâo mkŏ mkra anôk bruă nah gŭ lehanăn ƀuôn prŏng bi knar hluê hdră mrâo mrang.

Dŭm klei bi mlih anăn amâo djŏ knŏng ngă kơ tuê hiu čhưn ênguê ƀiădah wăt mnuih Điện Biên ăt bi kngăr. Lò Văn Diên, mnuih ƀuôn sang ƀuôn hgŭm Him Lam, ƀuôn prŏng Điện Biên Phủ yăl dliê:

Kâo ƀuh anôk bruă nah gŭ đĭ kyar êdi, boh nik hlăm dŭm thŭn giăm anei, kyua anăn mnuih ƀuôn sang m’ak êdi hlăm hdră mđĭ kyar bruă duh mkra nah gŭ mơ̆ng ƀuôn prŏng. Kâo lehanăn mnuih ƀuôn sang hlăm ƀuôn ăt čang hmăng mđĭ lar klei găl mâo čiăng mkŏ mkra alŭ wăl đĭ kyar hĭn

Lê Thành Đô, Khua anôk bruă sang čư̆ êa čar Điện Biên brei thâo: Thŭn 2022, čar Điện Biên dôk tal 2 kơ hnơ̆ng đĭ hlăm ênoh 14 čar krĭng čư̆ čhiăng, dôk tal 24/63 čar, ƀuôn prŏng hlăm kluôm ala, jing hnơ̆ng đĭ kyar êdi hlăm lu thŭn giăm anei. Klei hdĭp mnuih ƀuôn sang wăt ai tiê klei mĭn dưi mkra mđĭ, anôk bruă nah gŭ dưi duh bi liê rŭ mdơ̆ng. Thŭn 2023, hnơ̆ng đĭ kyar GDP mơ̆ng čar mâo 7,1% mkă hŏng mta kñăm Klei bi kƀĭn bruă Đảng čar, jing hnơ̆ng đĭ lu mkă hŏng hnơ̆ng kah knar mơ̆ng kluôm ala, dôk mrô 1 hlăm 14 čar hlăm krĭng kwar Dưr. Ênoh hrui mơ̆ng bruă hiu čhưn ênguê mâo 1.750 êklai prăk lehanăn ăt jing thŭn tal êlâo bruă hiu čhưn ênguê mơ̆ng čar mâo 1 êklăk čô tuê.

Thŭn anei, čar Điên Biên srăng bi hdơr 70 thŭn Hruê mblah dưi Điện Biên Phủ lehanăn mkŏ mjing thŭn Hiu čhưn ênguê ala čar – Điện Biên 2024, čar mđing dôk mprăp lehanăn čang hmăng mjing boh kdrŭt mrâo hlăm hdră mđĭ kyar bruă duh mkra – ala ƀuôn krĭng Yŭ Dưr hlăm wưng ti anăp. Lê Thành Đô mñă klă:

Knuă druh, êpul êya mnuih mă bruă, phung djă phao ktuang, mnuih ƀuôn sang dŭm djuê ana lehanăn êpul êya duh mkra mơ̆ng čar Điên Biên dôk mđing mđĭ lar knhuah gru Điên Biên Phủ jhŏng ktang, mtrŭt hdră mlih mrâo, ba yua tŭ dưn klei găl mâo mơ̆ng čar kñăm mjing boh kdrŭt hlăm hdră mđĭ kyar bruă duh mkra – ala ƀuôn, rơ̆ng kjăp klei êđăp ênang hlăm alŭ wăl. Mơ̆ng anăn mjing boh tŭ dưn kkuh m’ak knăm bi hdơr 70 thŭn hruê mblah dưi Điện Biên Phủ

70 thŭn leh hdră mblah kdrưh k’ang 5 krĭng lăn, kpư̆ mgei boh lăn lehanăn mâo boh tŭ yuôm prŏng hlăm ênuk anăn, hŏng klei ktưn hưn mjing boh kkdrŭt prŏng mbĭt hŏng ai ktang bi hgŭm mguôp jih jang mnuih ƀuôn sang, bruă Đảng, sang čư̆ êa lehanăn mnuih ƀuôn sang dŭm djuê ana tinei ba leh Điên Biên jing gru mngač ti ktuê êlan mlih mrâo nah Yŭ mơ̆ng ala čar./.