Hơêč hmưi klei tŭ jing mơ̆ng Klei blŭ hrăm hdră êlan hŏng tač êngao – bruă lĭng kahan – klei êđăp ênang Việt Nam – Russia, Lê Hoài Trung mñă klă, Đảng, knŭk kna leh anăn mnuih ƀuôn sang Việt Nam dlăng yuôm bhăn klei bi hgŭm knhuah gru, ƀĭng hgŭm hdră êlan kluôm dhuôm hŏng Russia.

Bi myuôm dŭm klei đĭ kyar jăk hlăm klei mjĕ giăm Việt Nam – Russia, k’iăng khua bruă tal 1 Phŭn bruă hŏng tač êngao Russia Vladimir Titov mñă klă, Russia dlăng yuôm bhăn bruă bi kjăp, mđĭ kyar klei mjĕ giăm hŏng Việt Nam. K’iăng khua phŭn bruă tal 1 Titov kah mbha klei hưn mơ̆ng Lê Hoài Trung kơ dŭm hdră tă, hdră êlan prŏng kñăm mtrŭt mđĭ klei mjĕ giăm dua lăn čar hlăm wưng kơ anăp, boh nik jing mtrŭt mđĭ dŭm gưl nao čuă gưl dlông hlăm thŭn 2024.