6 mlan akŏ thŭn anei, ênoh mnơ̆ng dhơ̆ng mâo ti alŭ wăl GRDP čar Dak Lak đĭ kyar êbeh 7%. Ênoh hrui wĭt ngăn prăk knŭk kna ti alŭ wăl čar mâo êbeh 8.700 êklai prăk, đĭ 1/3 mkă hŏng wưng anei thŭn êlâo. Hluê si Tạ Anh Tuấn, Khua knơ̆ng bruă sang čư̆ êa čar Dak Lak, wưng ti anăp jing wưng “mjing boh kdrŭt, mđĭ kyar ktang”, čiăng kơ čar dưi mâo mta kñăm mđĭ kyar 8% hlăm thŭn 2025.  

Khua knơ̆ng bruă sang čư̆ êa čar mtă: Ênoh hrui wĭt ngăn prăk thŭn anei brei đĭ ƀiă êdi 20% mkă hŏng klei đăo tĭng, brei mkiêt mkriêm kjăp hdră bi liê. Mtrŭt mđĭ hdră mkăp prăk duh bi liê knŭk kna, boh nik dŭm hdră phŭn, anôk bruă nah gŭ leh mkŏ dăp. Mđing msir mghaih jih bruă êmưt hluê ngă, mkra mđĭ boh tŭ hdră duh bi liê. Mđĭ kyar bi knar, mđrăm mbĭt ksĭng ksĭ – dliê, hŏng dŭm hdră răng mgang dliê, mđĭ kyar bruă rông mnơ̆ng hlăm êa. Mkra mđĭ hdră duh ƀơ̆ng kjăp kơ mnuih ƀuôn sang krĭng ktuê hang ksĭ lehanăn čư̆ čhiăng; mđĭ hdră msir lăm sang dôk êjai, sang tĭ ƀrôč êlâo kơ hruê 30/8/2025.