Hruê 25/8/2025, ti anôk bruă Đảng gưl dlông, Khua gĭt gai Đảng Tô Lâm mbĭt hŏng phung khua hlăm Phŭn bruă kđi čar mă bruă hŏng Êpul khua bruă Đảng knơ̆ng bruă lĭng kahan gưl dlông, brei klei blŭ mguôp kơ hră mơar leh anăn hdră êlan mnuih mă bruă Klei kƀĭn kluôm bruă Đảng lĭng kahan tal 12, wưng thŭn 2025 – 2030.

Leh hmư̆ klei hưn mdah, Phŭn bruă kđi čar čih yap leh anăn bi myuôm klei mprăp klă nik mơ̆ng Knơ̆ng bruă lĭng kahan gưl dlông, dŭm anôk bruă djŏ tuôm leh anăn gưl bruă Đảng nah gŭ, êpul bruă Đảng dŭm gưl hlăm bruă Đảng lĭng kahan. Klei kƀĭn kluom dŭm gưl hlăm bruă lĭng kahan dưi mkŏ mjing djŏ hdră bhiăn, mâo mă lu klei hriăm gĭt gai, mâo boh tŭ dưn jăk, knuă druh gĭt gai leh anăn phung bi ala djŏ ruah hŏng ênoh hră mplĕ lu. Knơ̆ng bruă lĭng kahan gưl dlông čŏng pô mprăp kơ hră mơar, mnuih mă bruă, djŏ hŏng asăp mtrŭn mơ̆ng Phŭn bruă kđi čar leh anăn klei ktrâo lač mơ̆ng gưl dlông. Phŭn bruă kđi čar mñă ktang lŏ dơ̆ng nao klă hŏng dŭm hdră êlan prŏng, rơ̆ng kơ klei tŭ jing mơ̆ng klei kƀĭn kluôm bruă Đảng lĭng kahan gưl tal 12.