Hlăm dŭm hrue yan hla luh mlan 8  anei, Hà Nội bŏ hŏng klei blêč blir hla čhiam gru hrah mtŭ kñĭ. Ai êwa mtluk mtlak mơak mñai hĭn leh ƀuh klei dôk hriăm mjuăt dŭm klei ruĕ kahan, ruĕ hlăm êlan klông ti wăl tač Ba Đình hƀuê ênuk. Hlăm djăp kdrêč êlan klei ruĕ kahan găn nao, mâo lu mnuih ƀuôn sang nao bi kăp dlăng. Mâo lu mnuih mơ̆ng čar mkăn truh mơng hruê êlâo, lehanăn kgŭ ư čiăng nao duah anôk dôk bi jăk kăp dlăng klei ruĕ kahan. Mai Hương hriê mơ̆ng Quảng Ninh lač:

“Kâo kgŭ mơ̆ng 5h30’ aguah hriê bi hnưm čiăng ruah anôk jăk, pioh mbĭt hŏng jih jang mnuih dlăng êpul ruĕ kahan găn hriê”.

Klei hriăm mjuăt tal dua mâo mkŏ mjing mlam mmăt hrue 24/8 leh êgao mơ̆ng êbeh 16.300 čô kahan hŏng 43 êpul ruĕ, 18 êpul dôk dơ̆ng; 6 êpul êdh đoh knong mơ̆ng lĭng kahan yang ƀuôn Việt Nam lehanăn 8 êpul êdeh truăn kơ bruă kahan ksiêm. Boh nik, mâo mbĭt hŏng êpul kahan Russia, Lào lehanăn Campuchia hriê bi mguôp mbĭt, bi êdah leh klei thâo bi mguôp hlăm bruă lĭng kahan Việt Nam hŏng ala tač êngao. Myun mâo dôk hlăm êpul “kahan mniê ngă bruă hâo hưn” nao hlăm klei ruĕ anei, Thiếu tá Nguyễn Thị Mùi, jing kahan truăn hlăm bruă mâo klei blŭ, leh lu mlan dôk hriăm mjuăt hlăm wăl tač Ba Đình:

“Čhuang jơ̆ng ep ruĕ hlăm wăl tač Ba Đình, kâo ƀuh bŏ hŏng klei mơak snăk, msĕ si lŏ đru ai ktang hĭn hlăm klei čhuang jơ̆ng hŏng klei kjăp. Êjai găn ti knưng, brei dai ƀô̆ ti knưng, boh nik ti msat Awa, hŏng ală lehanăn ai tiê bŏ hŏng klei mơak snăk.”

Mmông bi kƀĭn jih jang nao hlăm klei lông ruĕ mâo lu snăk mnuih ƀuôn sang hlăm ƀuôn prŏng phŭn lehanăn phung tue hriê dlăng. Hlăm elan klông anôk kdrêč kahan nao ruĕ, tinăn hla čhiăm gru bi kđhĭt mơak mñai, mđrăm mbĭt hŏng klei ủ driao hơ̆k mơak bi mđĭ ai. Hŏng grăp knhuang čhuang ep, êpul ep ruĕ hŏng klei kdrăm k’ah khuăt siam mơ̆ng êpul lĭng kahan lehanăn kahan ksiêm, mbĭt hŏng êpul mnuih ƀuôn sang nao hlăm klei ruĕ, lŏ hƀuê wĭt leh ai tiê jhŏng ktang mơ̆ng sa ênuk bi blah, kjăp nhuang hlăm klei rŭ mdơ̆ng lehanăn răng mgang lăn čar. Amâo mâo djŏ ƀiă ôh mnuih mơ̆ng dŭm boh čar mkăn hriê, lehanăn wăt phung tue ala tač êngao ăt truh mơng ưm čiăng dlăng mmông hriăm mjuăt ep ruĕ anei.

 Klei bi klin jih jang hlăm mmông ep ruĕ, mdưm leh hlăm ai tiê mnuih ƀuôn sang klei jưh knang, klei myưng m’ang kơ lĭng kahan yang ƀuôn, kahan ksiêm yang ƀuôn lehanăn ai ktang mơ̆ng klei bi mguôp jih jang djuê ana Việt Nam.