Leh mkrah mlan mơ̆ng Tuy Hoà hriê ti Ƀuôn Ama Thuôt mă bruă ti anôk bruă đoàn čar Dak Lak, amai Nguyễn Thị Như pral bi hơ̆ĭt anôk dôk, ruah sang hră hriăm kơ anak leh anăn bi mâo djăp klei čiăng yua hlăm klei hdĭp. Khădah dleh hŏng bruă knuă ti alŭ wăl mrâo, ƀiădah mâo mah jiăng, phung mă bruă mbĭt đru, amai Như amâo tuôm hŏng lu klei kpăk ôh.

 “Ti anăp srăng mâo lu bruă srăng mă, bruă lŏ ktrŏ hĭn. Bruă mmông êngao, bruă knhal jih hruê kăm anăp anei srăng lu êdi. Anôk mă bruă hđăp mâo aduôn aê đru, ară anei hriê ti anôk mă bruă mrâo 2 ung mô̆ gĭr mkŏ dăp čiăng mâo klei hơĭt mă bruă knuă”.

Ăt hriê ti alŭ wăl ngă bruă klam, amai Nguyễn Thị Thanh Huyền, mă bruă hlăm Êpul bruă hâo hưn leh anăn čung ba mnuih ƀuôn sang bruă Đảng čar Dak Lak brei thâo, amai leh anăn 25 čô knuă druh, phung mă bruă mrâo hriê dưi mâo klei đru mơ̆ng phung mă bruă mbĭt.

 “Mơ̆ng khua gĭt gai êpul bruă, dhar bruă leh anăn phung ayŏng adei đru duah sang dôk, sang hră kơ anak, mơ̆ng dŭm bruă điêt msĕ si anôk huă ƀơ̆ng, nao mă bruă. Kâo ƀuh klei bi mguôp msĕ si sa gŏ sang, čiăng kơ phung knuă druh mơ̆ng Phú Yên hđăp hriê ti Dak Lak mâo klei hơĭt mă bruă knuă leh anăn duh myơr kơ čar Dak Lak mrâo klă sĭt đĭ kyar”.

Leh bi mŭt mbĭt, giăm 700 čô mă bruă Knŭk Kna mơ̆ng Phú Yên hriê mă bruă ti anôk bruă Knŭk Kna mơ̆ng čar Dak Lak mrâo. Khădah bi mlih anôk hdĭp mda, klei găl mă bruă amâodah wăl hdĭp, ƀiădah diñu bi klă ai tiê, čŏng bi găl guôp, ñu kma leh anăn duh yơr.

Amai Như, mă bruă ti sang kdŏ mmuñ Sao Biển brei thâo, mâo klei khăp kơ bruă knuă leh anăn khăp kơ mah jiăng, ti anôk mă bruă srăng găl jih.

 “Bi hŏng anôk djăp anôk ăt dưi hdĭp jih, si ngă drei hdĭp đuč, si ngă drei thâo bi khăp leh anăn bi đru hlăm klei hdĭp”.

Bi amai Đỗ Anh Thư, knuă druh sang djă pioh mnơ̆ng đưm Phú Yên brei thâo:

 “Ară anei wĭt ti Dak Lak pô srăng bi mrâo klei hriăm, mjing klei anăn jing knhuah gru, pô jing mnuih ƀuôn sang alŭ wăl mơ̆ng Dak Lak. Duah klei hriăm čiăng kơ alŭwăl đru kơ mnuih ƀuôn sang, dŭm knhuah siam amâo lŏ bi kah krĭng ôh”.

Klei bi găl guôp hŏng anôk mă bruă mrâo čiăng mâo klei gĭr mơ̆ng grăp čô knuă druh, phung mă bruă Knŭk Kna. Dŭm klei bi kah mbha, klei bi đru mơ̆ng phung mă bruă mbĭt leh anăn anôk mă bruă mkŏ mjing klei bi mguôp mbĭt ti sang dôk hgŭm Dak Lak. Khădah mơ̆ng ti anôk hriê, wăt kơ ti alŭ wăl, jih jang dôk mđing truh mta kñăm mbĭt, mđĭ kyar ƀuôn sang hơĭt kjăp.