Anăp truh kơ klei bi hdơr 80 thŭn hrue kgŭ krŭ kdơ̆ng mlan 8 tŭ jing (19/8) lehanăn hrue mkŏ mjing lăn čar yang ƀuôn ngă phŭn êngiê Việt Nam (2/9), hrue mbrue  (31/7) ti Hà Nội, Khua gĭt gai Đảng Tô Lâm, Khua bruă Đảng lĭng kahan gưl dlông nao lehanăn kiă kriê klei bi tuôm phung knuă druh khua thŭn cách mạng, phung amĭ   Việt Nam jhŏng mtang, phung khua kahan, êpul lĭng kahan yang ƀuôn Việt Nam. 

Blŭ hrăm hŏng phung bi ala, Khua gĭt gai Đảng Tô Lâm mñă, khădah hlăm ênuk êđăp ênang, phung bi ala wĭt mdei leh, ƀiădah ăt dôk djă pioh nanao knhuah lĭng kahan awa Hô, dôk mâo nanao ai tiê klei dưi, jing leh anôk jưh kang kjăp kơ anak čô. Khua gĭt gai Đảng Tô Lâm đăo knang hŏng ai tiê hur har, mâo bruă klam, kmlăn ai tiê, hlăm klei thâo mĭn, tui si klei dưi mdê mdê, phung bi ala srăng lŏ mâo dŭm klei đru mguôp hŏng bruă cách mạng kdrăm k’ah mơ̆ng Đảng, mơ̆ng mnuih ƀuôn sang lehanăn mơ̆ng djuê ana, hrăm mbĭt bi ksul mbŭ, mđĭ hĭn klei thâo bi mguôp jih jang djuê ana, ba lăn čar drei knư̆ hrue knư̆ đĭ kyar, mdrŏng sah, jăk mơak, bi knar hŏng dŭm ala čar dlông rŏng lăn, djŏ msĕ si klei Awa Hô hmăng hmưi./.