Ti Đà Lạt, anôk bruă knŭk kna mơ̆ng čar Lâm Đồng ară anei mâo êbeh 1.300 phung mă bruă knŭk kna mơ̆ng Dak Nông leh anăn Bình Thuận. Êbeh 8000 čô adôk ti alŭ wăl hđăp čiăng ngă dŭm bruă hră mơar knŭk kna, mkŏ mjing klei găl hlăm bruă mgaih msir bruă knuă kơ mnuih ƀuôn sang. Bi hŏng 124 ƀuôn hgŭm, anôk bruă knơ̆ng leh mkŏ dăp, klei ngă hră mơar ƀrư̆ ƀrư̆ dưi mlih jăk. Hdră mơar dưi ngă djŏ mông, djŏ wưng kčah mâo êbeh 97% hlăm ênoh êbeh 18.500 hră mơar.

K’iăng Khua knŭk kna čih yap leh anăn bi myuôm boh tŭ dưn phŭn mâo čar Lâm Đồng dưi mâo hlăm klei ngă bruă bruă sang čư̆ êa alŭ wăl 2 gưl, rơ̆ng kơ klei mđĭ kyar bruă duh mkra ala ƀuôn mơ̆ng alŭ wăl. Bi kơ bruă mprăp kơ klei kƀĭn kluôm bruă Đảng, čar leh anăn ƀuôn hgŭm ngă jăk, klă hŏng hdră kčah leh anăn bruă klam mâo leh. K’iăng Khua knŭk kna Nguyễn Hòa Bình lač, mđĭ kyar bruă duh mkra mơ̆ng Lâm Đồng ară anei ka năng hŏng klei găl, knŏng mâo mă 5%. Êngao kơnăn, bruă hluê ngă đa đa hdră kñăm ăt adôk êmưt, dleh dlan hlăm bruă ruh mgaih anôk ala, klei čan duh bi liê bruă knŭk kna ka djăp klei čiăng, bruă kriê dlăng ngăn dŏ, mnơ̆ng gŭ lăn adôk êdu kƀah, đa đa mnuih ƀuôn sang krĭng mnuih djuê ƀiă ăt adôk dleh dlan... Dŭm boh klei anei čiăng mđĭ hĭn klei gĭt gai, klei uêñ mĭn leh anăn mgaih msir hlăm wưng kơ anăp./.