Đĭng Ta Lĕh dôk hlăm kdrăp ayŭ mơ̆ng mnuih djuê ana Jeh Triêng. Đĭng anei mkra mơ̆ng đĭng đrao dlông hlăm brô 70cm, 2 akŏ tluôm ƀăng bơ̆ng sơăi. Ti krah awan đĭng anăn ƀoih sa ƀăng pioh ayŭ. Êjai ayŭ, mnuih ayŭ djă đĭng mgăn. Pô thâo ayŭ Brôl Vẻ, ti ƀuôn Đắk Răng, să Đắk Dục, kdriêk Ngọc Hồi, brei thâo:

"Mta đĭng ayŭ anei jing yua hŏng kđiêng kngan, ăp ti gŭ đĭng. Tơdah ayŭ mmang jing amâo mâo kbiă sa mta êwa ênai siam ôh, msĕ si êdu ktang điêt prŏng. Đĭng anei knŏng pioh yua hŏng phung êkei, bi phung mniê amâo mâo tuôm ƀuh yua ôh. Ayŭ đĭng tŭt bi ƀar m’iêng, bi ayŭ đĭng ta lẹh snăn amâo mâo guôn ôh”.

Knhuah hlăm kdrăp pĕ tông lehanăn ayŭ mơ̆ng djuê ana Giẻ Triêng jing êdu êun, msĕ si klei blŭ êmhač, bi êdah mơ̆ng lam ai tiê adih mơ̆ng phung hlăp ñu. Hlăm anăn ênai mñê êdu siam mơ̆ng đĭng Ta lẹh êjai dôk hlăm pưk hlăm hma jing klă hĭn yơh ngă kơ ai tiê mnuih hmư̆ êđăp ênan, bi êdah kơ klei trei mđao, jăk mơak mơ̆ng mnuih Giẻ Triêng.

Ênai đĭng Ta lẹh bi knăl kơ ai tiê hơăi mang, kơ klei hnŭk ênang hŏng mnuih mă bruă pưk hma. Tui si Brôl Vẻ, êjai hlăm yan buh kjŭk, asăr mjeh trôk hlăm đĭng nuh, djă ba truh kơ hma.

Êjai kkui rŏng dôk buh, asăr mjeh mâo mplĕ hlăm ƀăng leh kjŭk, hŏng ênai đĭng nuh ktut ti ƀăng leh kjŭk mjing sa ênai siam, mđrĭng hŏng ênai angĭn thut hlăm đĭng nuh, jing msĕ si mtrŭt phung mniê dôk buh hur har hĭn. Mơ̆ng anăn mơh dơ̆ng mâo yơh klei mĭn duah êlan mkra đĭng Ta lẹh. Đĭng anei ñu tui nao mbĭt hŏng bruă pưk hma, anăn mơh jing klei jăk mơ̆ng kdrăp pĕ tông lehanăn ayŭ mơ̆ng djuê ana Giẻ Triêng.

Tui si klei bhiăn mâo leh mơ̆ng aê aduôn pô đưm, đĭng Ta Leh knŏng kreh ba yua hlăm sa wưng, amâodah sa yan anăn jing êlâo kơ yan puôt êmiêt.

Ệai mdiê hlăk hlê êdai hla, leh êgao mlan 7 hlŏng truh kơ yan puôt êmiêt arăng amâo lŏ ayŭ ôh. Êjai ti mmông nao kơ hma, kơ pưk êjai mdei msăn, thâodah yang hrue dơ̆ng, adiê tlam bi ayŭ đĭng čiăng kơ ai tiê êđăp ênang mdul jih klei sưai êmăn mơ̆ng bruă knuă.

 Tui si klei bhiăn mâo leh mơ̆ng mnuih djuê ana Giẻ Triêng, Ta lẹh knŏng ayŭ ti hma. Êngao kơ bruă pưk hma dưi bi êdah ai tiê klei mĭn pô snăn đĭng Ta lẹh lŏ bi knăl hlăm pưk ti hma anăn dôk mâo mnuih hlăm hma, dôk pruh ktiă tăm hril.

Êngao kơ anăn, mnuih djuê ana Giẻ Triêng ăt kăm biăt mơh ayŭ đĭng Ta lẹh ti sang thâo dah hlăm dŭm klei mnăm huă. Đĭng anei knŏng brei dưi ayŭ hlăm pưk ti hma, amâo mâo dưi ba wĭt yua ti sang hlăm ƀuôn ôh. Mblang kơ klei anei, Nai prĭn Bùi Ngọc Quang, K’iăng khua Sang kriê pioh ngă drăp djuê ana Việt Nam, lač:

 "Diñu amâo mâo pioh ôh kdrăp ayŭ anei ti sang ƀiădah mdăp hlăm dliê. Diñu yap anei jing mnơ̆ng yuôm bhăn, snăn brei thâo kriê pioh hlăm anôk hgăm. Mnuih ƀuôn sang ti lăn dap kngư kreh hdĭp hŏng kmrơ̆ng dhông, anăn yơh anôk jăk, anôk jĕ giăm, anôk sĭt suôr hŏng digơ̆. Digơ̆ mnơ̆ng digơ̆ mâo hlăm kmrơ̆ng ƀuh jing êđăp ênang hĭn”.

Siămdah, tui si thŭn mlan, đĭng Ta lẹh ară anei jing leh kdrăp yua lu hlăm mnuih djuê ana Giẻ Triêng bi kƀăk yuôl hlăm sang, lehanăn pioh yua nanao hlăm grăp hrue, hlăm dŭm anôk huă mnăm, jing hrue mơak kơ găp djuê lehanăn ƀuôn sang.

Mơ̆ng ênuk đưm đă ba kơ ară anei, mnuih djuê ana Giẻ Triêng, khăp snăk kơ kdrăp pĕ ayŭ, lehanăn lu mnuih ƀuôn sang adôk djă pioh hlue knhuah phŭn gơ̆ jing leh. Đĭng Ta lẹh lehanăn lu mta kdrăp mkăn hlăm mnơ̆ng pioh pĕ tông lehanăn ayŭ mơ̆ng djuê ana Giẻ Triêng jing amâo mâo djŏ knŏng bi êdah knhuah gru dhar kreh hjăn mơ̆ng djuê ana Giẻ Triêng, ƀiădah lŏ mâo bi lar jing lu mta kdrăp pĕ tông lehanăn ayŭ mơ̆ng djăp djuê ana hlăm kluôm ala čar Việt Nam.