Krơh àng, lam lài tàm broă bơtàu tơnguh lơh sa, đảng viên Tòng Văn Lải, ci ƀộ ƀòn Co Phung, sàh Hua La, ƀòn dờng Sơn La, càr Sơn La neh rơwah broă tam kơphe, ròng rơpu, kơnrồ, sur iar nàng lơh tơrlòng lài ai làng bol tàm ƀòn in đờm jăt bal, mờ bơtàu tơnguh lơh sa hìu nhă. Kơnờm mờ broă git ngui bơta chài măi mok pa bè sih phơng, koh ntê di tŭ gơwèt mờ phan tam; cih vaccine mờ tơnguh tơl phan sa ai phan ròng in, tus tŭ do, broă tơrlòng lơh sa tàm bă ù ơnàng 1 lồ 5 sào bơh hìu nhă dê pah nam tăc rơlao 40 nơm sur; 15 tấn plai kơphe ris, kờp jơh priă tă lơh, gam geh priă cồng 300 tơlăk đong.

Đảng viên Tòng Văn Lải pà git, bơh cồng nha lơh sa loh làng bơh broă tơrlòng lơh, să tờm bi sùm dong kờl ală hìu tàm ƀòn, tàm sàh bè bơta chài ròng phan, tam phan nàng gơguh lơh sa, tam gơl phan tam, tơnguh uă priă geh: “Añ kung lam oh mi lơh jăt añ dê, añ lơh gơtùi broă lơi den bơto sồr oh mi lơh jăt bal. Oh mi lơi ờ tơl priă añ kung ai càn, bè là kờñ blơi sur ròng, ha là kơnrồ nàng ròng den añ kung tă priă nàng ai oh mi in càn”.

Lơh jăt Broă lơh bơ̆t bơtàu ƀòn lơgar pa, ci ƀộ ƀòn Co Phung, sàh Hua La, ƀòn dờng Sơn La, càr Sơn La neh lam ală hìu làng bol tàm ƀòn cri bơyai, ring bal bơyai lơh geh cồng nha ală khà broă, tàm hơ̆ uă ngan là broă lơh gùng lòt tàm ƀòn, geh sùm mpồl ƀòn sền gàr bơta lơngăp lơngai, bơ̆t bơtàu rài kis niam chài pa… bơh nam 2021 tus tŭ do, ci ƀộ ƀòn neh lam làng bol tă geh 650 tơlăk đong, ai rơlao 500 thơ̆k vuông ù, mờr 2 rơbô ngai lơh broă; uă hìu tŭ lơi kung rơcang lài sờr hìu, tam gơl, ntrờn hìu nàng lơh 1 kơi sồ 600 thơ̆k gùng lòt dă mờ bê tông; 4 kơi sồ gùng lơh tàm dơlam ƀòn, drơng broă lòt rê, kă bro phan. Mò Lèo Thị Tiển, mpồl cau atbồ is ƀòn sồ 5, ƀòn Co Phung pà git: “Ngai lài gùng lòt dềt ờ ơnàng, tŭ do geh Dà lơgar lơh gùng lòt pa nàng làng bol in lòt rê ƀuơn niam, hìu nhă añ kung ring bal tŭ pal koh ñjong hìu tờm añ dê”.

Jăt ồng Lò Văn Hội, Ƀí thư Ci ƀộ, Kwang atbồ ƀòn Co Phung yal, mờr 10 nam do, ci ƀộ ai ală tơngu me lơh pràn, tàm hơ̆ geh: tơnguh uă bơta niam pơrjum ci ƀộ; tam gơl pa gùng dà broă đơng lam; bơ̆t bơtàu rài kis niam chài tàm ƀòn ơm kis; lam sồr làng bol tam gơl phan tam, phan ròng di pal… Tus tŭ do, ƀòn geh 240 hìu, rơlao 1 rơbô 100 nă làng bol, tàm hơ̆ mìng gam 5 hìu pa lik klàs rơƀah, ờ gam hìu rơƀah; priă geh tơl nă cau kờp dŭ 50 tơlăk đong tàm 1 nă 1 nam; tàm ƀòn neh geh ală broă tơrlòng lơh sa geh priă uă git nđờ rơhiang tơlăk  đong tàm 1 nam: “Tàm tơngai tus, ci ƀộ kung bè ală đảng viên rơ̆p pơn jăt tai bơsram jăt krơh niam, nùs nhơm, ơnà jăk Hồ Chí Minh, lam làng bol pơn jăt tai bơtàu tơnguh lơh sa, kloh niam tiah kis, bơtàu tơnguh ƀòn lơgar pa tơnguh uă. Tơrgùm tàm broă bơtàu tơnguh lơh sa hìu nhă, ngui bơta chài măi mok pa, ròng phan, tam ală bơta tờm chi sa plai geh bơta kwơ uă”.

Ồng Lò Văn Chính, Ƀí thư Đảng ủy sàh Hua La, ƀòn dờng Sơn La pà git, lơh jăt jơnau sồr sồ 05 bơh Ƀộ Cíñ trị dê, Ci ƀộ ƀòn Co Phung neh tam pà đảng viên lơh jăt jơnau lơh nền tàm pơrjum bơh Ci ƀộ dê, drơng broă lơh jăt tàm ală mpồl lơh broă, mpồl ƀòn. 40 nă đảng viên tàm ci ƀộ ndrờm là làng bol kòn cau Thái, sùm lam lài lơh gơs kơnòl geh tam pà, gàr niam gơnoar đơng lam bơh ci ƀộ dê, ală broă lơh bơh ƀòn, ală mpồl lơh broă ndrờm geh lơh sùm mờ lơh niam: “Kwơ màng rơlao tai là ală đảng viên tàm ci ƀộ neh geh kơnòl bơyai lơh tus ală mpồl hìu, kung bè mpồl ƀòn bơh să tờm dê bè gùng dà broă lơh bơh Đảng, adăt boh lam bơh Dà lơgar dê, tàm hơ̆ uă ngan là jơnau lơh nền tàm pơrjum ci ƀộ geh ai pah nhai tàm broă bơtàu tơnguh lơh sa mpồl bơtiàn, kung bè đah rài kis niam chài mpồl bơtiàn bơh ƀòn hơ̆ dê. Bơh tŭ hơ̆, làng bol wă, hơ̆ sồng tam klăc bal, bơ̆t bơtàu, ai geh ală jơnau đơs pơgồp bal, gùng dà broă lơh nàng lơh bè lơi tơnguh uă rài kis phan bơna, nùs nhơm làng bol in”.

Bơsram mờ lơh jăt Wa Hồ mờ ală broă lơh mùl màl, tơnguh nùs nhơm tam klăc bal, dong kờl bal, tơriang tàm lơh broă, lơh sa, ƀòn Co Phung neh mờ gam tam gơl pah ngai, muh măt ƀòn lơgar ngai sơlơ niam bơnĕ; ală bơhiàn ờ niam tàm gùng tam bao, chơ̆t jê kung neh sơrbì; uă bơta niam chài ală jơi bơtiàn geh prăp gàr mờ ngui niam. Sùm uă nam tơn, Ci ƀộ ƀòn Co Phung gơs Ci ƀộ pơnrơ jăk ngan ƀòn dờng Sơn La dê.