Broă tam gơl pa bồ tơngoh kơlôi sơnơng atbồ, gròi sền niam phan bơna broă lơh sa suơn sre bơh sơn rờp mờ sơlơ tơnguh tai bơta lơh bal tàm ală bơta kwơ geh sền là broă lơh kwơ màng nàng tă bơsong kal ke mờ wèt tus bơta bơtàu tơnguh kơ̆ kơl jăp jŏ jòng bơh gah sầu riêng dê- dùl gah tăc phan mờ lơgar ndai “ tơmàn dolar”. Do là jơnau đơs geh ală cau ala mat đơs tàm pơrjum bơyai pờ tơlik tơn tàm internet geh bơyai lơh tàm ngai 10/06 tàm Hà Nội, mờ bơta tus bal bơh ala mat ală Ƀộ, gah broă, Ală mpồl Biăp bùm kơnuh plai đo Việt Nam, ală cau gĭt wă jrô broă lơh sa suơn sre, mpồl lơh sa kă bro tăc phan mờ lơgar ndai mờ ală cau lơh suơn tam sầu riêng tàm ală tiah tàm Cần Thơ, Dăk Lăk mờ Tiền Giang.

Ală cau ala mat đơs nền Sầu riêng neh gơ gơs dùl tàm ală gah phan bơna tờm ngan, tă pơgồp dờng mờ lơh geh priă jền tăc plai chi mờ lơgar ndai bơh lơgar Việt Nam dê. Mơya, bơdìh mờ tŭ tơngai niam dờng kung gam geh ờ dồ ềt bơta lòng. Sồr kal ke ngan bơh drà kă bro dê bè bơta niam bơkah phan bơna, tiah tờm lơh gơlik, mã sồ tiah tam; bơta ờ tơl lơh bal tàm ală anih lơh geh bơta kwơ; bơta bơtàu tơnguh uă ir ờ tơl bơta sŏk sền; pơhìn tu kòp aniai, tam gơl nhơm trồ tiah; mờ bơta gơ jat bal tàm bàr pe drà kă bro is ồn là ală broă kờñ pal geh bơsong di tŭ. Jat ală cau gĭt wă jrô broă lơh, pal lam lơh mơ ală broă lơh jal mhar, tàm hơ̆ is ồn đơs sùm tus broă tam gơl bồ tơngoh atbồ. Broă bơt bơtàu kơrnoat boh lam sŏk sền kràñ bơh chờm tus tăc bro phan rơ̆p là bơta tờm ngan nàng ai wơl bơta pin dờn bơh cau ngui sa dê mờ lơh geh bơnàng jă ai bơta bơtàu tơnguh kơ̆ kơl jăp jŏ jòng bơh gah do dê.