Ală ngai do, cau lơh broă sa kơnhoàl Cư̆ Kuiñ, càr Dăk Lăk mŭt tàm kàl tờm pik tơnhàu gar tiêu kàl lơh sa nam 2024- 2025. Giă gar tiêu neh ơm tàm khà mờr 160 rbô đong dùl kĭ (khà giă jơnhoa ngan rlau jơh bơh nam 2016 tus tŭ do) gam lơh gơlik geh tai bơta gơn kơnờm dong làng bol iang nùs bơcri uă rlau tàm bơta chi do. Jơh gùt kơnhoàl Cư̆ Kuiñ tŭ do geh pơgăp 4 rbô 700 lồ tiêu gam tàm tơngai gơ ai sa, gar tiêu lơh geh kờp bal rlau 3 tấn 2 tạ tàm dùl lồ, tiêu lơh geh kờp bal pah nam geh rlau 15 rbô tấn.

Jăt ồng Nguyễn Cảnh Danh, Phó Lam bồ Cơldŭ Broă lơh sa sươn sre mờ Tiah ơm kis kơnhoàl Cư̆ Kuiñ, càr Dăk Lăk, ală nam rềp ndo, giă gar tiêu ơm tàm khà jơnhoa neh dong làng bol iang nùs bơcri lơh gơlik. Bơdìh mờ dong kờl làng bol bè bơto pơlam jak chài măy mŏk, gơnoar ătbồ kung bơto sồr làng bol lơh broă sa bañ ur ar rề ơnàng bă ù tam, pơn jăt tai bơcri tam tàm bă ù gam geh tŭ do jăt gùng dà ờ ngui sơnơm sền gàr phan tam, kơ̆ kơl jăp.