Dơ̆ sơn rờp tàm rài kah yau dơ̆ lơh chờ kơphê, mò Vanusia Nogueira – Kwang Lam bồ dờng Mpồl Kơphê Ală lơgar (ICO) – neh tus bal mờ geh jơnau đơs kwơ màng tàm dơ̆ sơnđờm mut lơh. Broă lơh do lơh tềl broă lơh kwơ màng tam broă tơnguh uă gơnoar bơh kơphê Việt Nam dê tàm ală broă lơh kơphê gùt plai ù.

Tàm 3 ngai tus bal ală broă lơh bơh dơ̆ lơh chờ dê, mò Vanusia Nogueira đơs bơta ngoh rơngăc:“Añ deh dờng bơh dùl hìu bơnhă tam kơphê, bol añ sùm đơs tàm Brazil là bol añ geh kơphê tàm do ala tài mhàm. Mờ niam ngan tŭ añ gŏ ƀòn dờng do kis mờ kơphê bè do mờ phan pà mờ gơnoar atbồ càr dê neh pà ală cau tam kơphê in. Tài bơh hơ̆ là dùl dơ̆ yờ sa chờ hờp mờ dơ̆ yờ sa hơ̆ mìng ờ mìng lời ai bol añ in lơm, gơ lời ai jơh cau tam kơphê tàm hơ̆ in, jơh ală hìu bơnhă geh mat tàm hơ̆, mờ do là dùl bơta ngoh rơngăc uă ngan”.

Dơ̆ lơh chờ kơphê nam do geh bơta tus bal bơh 28 mpồl năc ală lơgar, pờ geh uă tŭ niam kă bro mờ tàm tơrbŏ bal. Ală broă lơh pơn rơ ngan, bè: Drà ràng tơlik mìng gah kơphê lơm, Pơrjum kă bro Ală lơgar, dơ̆ pơrlòng coh kơphê bơkah pơn rơ Việt Nam nam 2025 halà Ngai chờ kơphê ờ sa priă neh tơrgùm gĭt nđờ rơhiang anih ràng phan bơh ală mpồl lơh sa kă bro tàm lơgar mờ lơgar ndai. Ồng Lê Đức Huy, Củ tịc Mpồl Duh broă tàm mpồl Kông ty TNHH MTV Tăc mờ blơi phan mờ lơgar ndai 2/9 Dăk Lăk, chờ hờp đơs: “Simexco mờ nùs nhơm brơn brài ngan tŭ tus bal Dơ̆ lơh chờ kơphê nam do mờ bol añ sền hơ̆ là dơ̆ Sa tềp bơh kơphê Việt Nam dê. Añ 16, 17 nam lơh bè kơphê Dăk Lăk, sùm tus bal geh 6 dơ̆ lơh chờ rao mờ pah dơ̆ lơh chờ là dùl bơta krơi is mờ dơ̆ lơh chờ dơ̆ do là dơ̆ lơh chờ lơh gơlik jrô ngan. Bol añ tàm pà bal bơta pràn pa nàng mut gơrờm bal nàng sơlơ bơtàu tơnguh nàng lơh ai robusta Việt Nam in geh cồng nha lơh geh pa..”

Gơ hòi gơ jà pơgăp 250 rơbô dơ̆ năc lòt nhơl, tàm hơ̆ geh 1 rơbô 800 nă năc ală lơgar, Dơ̆ lơh chờ ờ mìng là tŭ niam nàng yal tơngĭt uă bơh ală mpồl lơh sa kă bro dê lơm mờ gam là dơ̆ nàng làng bol mờ năc lòt nhơl in mut bal tàm ù tiah niam chài pơn rơ ngan bơh Dăk Lăk dê. Ồng Y Lơi Ayun, ơm tàm sàh Ea Yông, kơnhoàl Krông Pắch, đơs: "Cau lơh broă sa tus bal dơ̆ lơh chờ kơphê dơ̆ 9 là brơn brài ngan kung là lơh geh ală bơta nàng ai cau lơh broă sa in bơtàu tơnguh lơh sa hìu bơnhă ngai sơlơ uă. Do kung là bơta ƀuơn, bơta pràn nàng jòi priă bơcri tàm lơgar mờ dunia dê”.

Bi Phương Oanh, cau tàm mpồl Mpồl Cau lơh sa kă bro kơnòm să càr Gia Lai, đơs: “Geh dùl bơta is ồn mờ añ gơlơh niam ngan tài đơng lam bồ càr Dăk Lăk sền gròi ngan mờ dong kờl ai mpồl cau lơh sa kă bro in den tàng neh lơh geh tiah lơh broă do hơ̆ là bơta tìp mat lơh kwèng bơh ală mpồl cau lơh broă sa tàm bơdìh càr mờ ală lơgar dê. Tài nhơm trồ tiah Buôn Ma Thuột niam bè do den ngan ngồn là dùl Dơ̆ lơh chờ di pal ngan nàng ai uă cau ndai in gĭt tus.”

Năc lòt nhơl ală lơgar kung gơ kờñ tŭ tus mờ dơ̆ lơh chờ Kơphê Buôn Ma Thuột dơ̆ do. Bi John Cuttance Dunedin, tus bơh lơgar New Zealand, đơs:“Kơphê tàm do bơkah ngan, phan sa gơ kờñ ngan, kòn bơnus den đềt mềr. Añ kơlôi là dùl ngai lơi hơ̆ añ rơ̆p wơl tai mờ bơcri priă tàm càr Dăk Lăk”.

 Ồng Marc Knapper, Kwang atbồ anih lơh broă ala mat lơgar Mỹ tàm lơgar Việt Nam kung jờng rơ uă ngan broă lơh do: “Bol añ neh tus bal uă broă lơh tàm lơgar Việt Nam, mơya Dơ̆ lơh chờ Kơphe Buôn Ma Thuột là dơ̆ lơh chờ niam ngan rlau jơh mờ bol añ neh tus bal. Broă bơyai lơh chài ngan mờ bềng bơta ngoh rơngăc”.

Drờm bal mờ ală broă lơh chờ, càr Dăk Lăk neh bơyai lơh dơ̆ lơh sơnđờm mut lơh uă rơndăp broă lơh kwơ màng bè Mpồl Anih tờm kă bro phan- Hìu năc- Hìu ơm tàm ƀòn dờng Buôn Ma Thuột, rơndăp broă lơh Tiah lơh sa mờ măi mok Phú Xuân mờ is ồn là Hìu măi kơphê Trung Nguyên Legend – hìu măi kơphê dờng ngan rlau jơh tiah đah Jum mat tơngai lik câu Á dê. Ală rơndăp broă lơh ờ mìng tam gơl muh mat tiah drà lơm mờ gam pơgồp bơnah ai Buôn Ma Thuột in tus rềp rlau tai tus mờ jơnau kờñ gơ gơs “Ƀòn dờng kơphê bơh dunia dê”. Đơs tàm dơ̆ tơn jơh dơ̆ lơh chờ, ồng Nguyễn Thiên Văn, Phó Củ tịc Anih duh broă Làng bol càr Dăk Lăk, đơs nền: “Cồng nha bơh dơ̆ lơh chờ kơphê Buôn Ma Thuột dơ̆ 9 là bơta gơn kơnờm pràn ngan nàng bol añ in pơn đơl pràn lơh ngan rlau tai tàm gùng lòt tài jơnau kờñ bơt bơtàu càr Dăk Lăk bơtàu tơnguh mhar, pas niam, niam jak, niam chài. Mờ do kung là tŭ tơngai niam nàng jờng rơ phan bơna kơphê Việt Nam mờ tơnguh uă mat kă bro Kơphê Buôn Ma Thuột tàm anih lơh broă ală lơgar dê”.

Dơ̆ lơh chờ kơphê Buôn Ma Thuột dơ̆ 9 ờ mìng là dùl broă lơh niam chài lơm mờ gam là dùl tềl lời wơl kwơ màng tàm gùng lòt đơs nền mat kă bro kơphê Việt Nam. Mờ bơta tus bal bơh ală mpồl ală lơgar, mpồl lơh sa kă bro, làng bol mờ năc lòt nhơl, dơ̆ lơh chờ neh lơh geh dùl ù tiah tìp mat lơh kwèng niam ngan, pờ geh uă tŭ niam bơtàu tơnguh ai gah kơphê càr dê in. Cồng nha do rơ̆p là bơnàng jă kơ̆ kơl jăp nàng càr Dăk Lăk in pơn jat tai brồ guh ngài rlau, ai Buôn Ma Thuột in gơ gơs tiah tus bơh kơphê dunia dê.