Do là broă lơh mìng dùl gah bơh Ală mpồl kơphê Buôn Ma Thuột bơyai lơh gơ hòi gơ jà bơta sền gròi bơh cau lơh kơphê ờs mờng tàm lơgar mờ ală lơgar dê. Tàm 4 ngai (bơh ngai 10 tus ngai 13/03), 36 nă cau pơrlòng tus bơh 13 càr, ƀòn dờng tàm jơh gùt lơgar rơ̆p lòt gan 2 dar pơrlòng, geh: dar bơh sơn rờp mờ tơngume lơh jat jơnau pơrlòng coh lài, klài mờ đơs bơta bơkah bơh kơphê hơ̆ dê, bơh hơ̆ rơwah 20 nă cau geh khà điềm jơnhoa ngan rlau jơh mut tàm dar dŭt ndơl.

Tàm dar dŭt ndơl, cau pơrlòng lơh jat jơnau pơrlòng cok gơ gơs phan bơna ai klài Pour Over mờ klài Phin. Tàm tơngume do, ală cau pơrlòng pal klài bơrlŭ khà đah kơphê Arabica mờ Robusta nàng ai geh phan bơna bơkah ngan rlau jơh. Den tàng bè hơ̆, tus bal dơ̆ pơrlòng do, cau cok kơphê ờ mìng geh gơnoar broă lơh gơ rề uă bơta bơkah lơm mờ gam mblàng yal gơ tus mờ cau hùc dà kơphê in tai kung bè gĭt jơnau sền sơwì bơh phan bơna kơphê coh bơh he dê.