Tơnguh bơngă kơphe lơgar Việt Nam
Thứ sáu, 08:17, 14/03/2025 Cau mblàng Ndong Brawl/VOV Tây Nguyên Cau mblàng Ndong Brawl/VOV Tây Nguyên
VOV4.K'Ho- Tàm lơh chờ kơphe Buôn Ma Thuột dơ̆ 9 pa do neh bơyai lơh Dơ̆ pơrlòng Cau lơh broă sa suơn sre jăk nam 2025 mờ tơngu me “Tam kơphe ngăc ngar”. Bal mờ hơ̆ là pơrjum tìp bal kă bro phan mờ ală lơgar “Tơrbŏ, tơnguh bơta bơkah kơphe lơgar Việt Nam”. Ală broă lơh do kờñ tơnguh uă bơta bơkah kơphe dê, di pal mờ jơnau kờñ tăc mờ lơgar bơdìh, cèng geh bơta kwơ ai làng bol lơh broă sa suơn sre bal mờ mpồl lơh sa kă bro kơphe in.

Dùl tàm ală broă lơh tờm tàm Lơh chờ Kơphe Buôn Ma Thuột dơ̆ 9, hòi jà gal cau tam kơphe tàm gùt lơgar sền gròi, hơ̆ là Dơ̆ pơrlòng Cau lơh broă sa suơn sre jăk nam 2025 mờ tơngu me “Tam kơphe ngăc ngar”. Tus bal dơ̆ pơrlòng geh 4 mpồl tus bơh ală càr: Dăk Lăk, Kon Tum, Bình Phước, Sơn La. Do là ală mpồl jăk ngan geh rơwah bơh ală dar pơrlòng lài nàng rơwah ală mpồl cau lơh broă sa tam kơphe geh pơnrơ ngan tus bal tàm mang pơrlòng dŭt ndơl. Mờ tơngu me “Tam kơphe ngăc ngar”, ală cau pơrlòng sơrlèt mờ 4 bơnah broă: Cau lơh broă sa suơn sre niam să, cau lơh broă sa suơn sre ngăc ngar, cau lơh broă sa suơn sre pơgồp bal mờ cau lơh broă sa suơn sre tơrlòng.

Lŏ Hroda Ayun, kòn cau Rơđê, cau tàm mpồl pơrlòng càr Dăk Lăk yal: bơh dơ̆ pơrlòng, să tờm lŏ geh tai uă jơnau git wă pa tàm broă tam kơphe geh bơta bơkah uă. “Tam kơphe ngăc ngar di gơlan lơh tơrmù nhơm ƀơ̆ mờ sền gàr ù, dà bal mờ tiah kis. Bơh dơ̆ pơrlòng do, să tờm añ rê bơto wơl làng bol in ală jơnau git wă mờ añ neh geh bơsram nàng làng bol gơtùi sơnka sền gàr tàm suơn kơphe tềm pềr mờ geh cồng nha ngan, nàng broă lơh sa bơh làng bol dê geh bơtàu tơngu mờ tơrmù priă tă tàm broă lơh”.

Dơ̆ pơrlòng Cau lơh broă sa suơn sre jăk nam 2025 mờ tơngu me “Tam kơphe ngăc ngar” geh bơyai lơh tàm Ƀlàng dờng nhai 10 nhai 3, ƀòn dờng Buôn Ma Thuột, càr Dăk Lăk neh òi jà broă sền gròi bơh làng bol lơh broă sa suơn sre dê. Ồng Y Mơi Mlô, kòn cau Rơđê tus bơh sàh Cư̆ Né, kơnhoàl Krông Búk tus sền dơ̆ pơrlòng pà git, rài kis làng bol bơh tơnơ̆ ngai dà lơgar geh tơnhklàs tus tŭ do mìng kơnờm bơh broă lơh kơphe dê. Is ồn ngan bơh nam lài tus tŭ do, priă tăc kơphe gơguh uă den tàng rài kis làng bol neh gơguh rơlao. Jăt ồng Y Mơi Mlô yal, broă bơyai lơh pơrlòng “Cau lơh broă sa suơn sre jăk” tàm lơh chờ kơphe Buôn Ma Thuột kung dong kờl làng bol tơnguh uă bơta bơkah kơphe nàng tăc mờ lơgar bơdìh. “Rài kis làng bol geh gơguh, den tàng tŭ do kơphe geh priă tăc. Geh uă bơta tam gơl, rài kis bơtàu tơnguh, geh priă blơi rơndeh kung kơnờm bơh kơphe gơguh priă tăc, làng bol chờ hờp ngan. Bơh lơh chờ kơphe do, kung kờñ ală cau tàm dunia git tus kơphe Buôn Ma Thuột geh bơta bơkah nàng tăc mờ lơgar bơdìh. Kơ̆p kờñ tơnơ̆ do kơphe geh gơguh priă tăc uă rơlao tai nàng làng bol geh rài kis niam bơnĕ rơlao”.

Tàm dơ̆ pơrlòng Cau lơh broă sa suơn sre jăk nam 2025 mờ tơngu me “Tam kơphe ngăc ngar”, ală cau pơrlòng neh ai tơngŏ jơnau git wă, jơnau mờng chài mờ git tàm broă ngui bơta gơguh jăk măi mok pa tàm broă lơh kơphe ngăc ngar gơdờp mờ tam gơl trồ tiah mờ ală bơta gơrềng tus mờ broă lơh kơphe, drà kă bro, pơgồp bal lơh sa, lơh geh sră dờp, lơh gơs mờ bơtàu tơnguh mpồl pơgồp bal tàm gah phan kơphe lơgar Việt Nam dê. Là cau tàm mpồl càr Bình Phước, ồng Nguyễn Văn Nhân đơs là dơ̆ pơrlòng là ƀlàng nhơl mùl màl geh kwơ ai làng bol lơh broă sa tam kơphe in. “Bol añ pơnyờ să ngan tŭ tus bal tàm do nàng yal ală jơnau git wă nàng làng bol in wă tàm broă lơh geh cồng nha uă bal mờ bơkah. Tài drà kă bro tŭ do cau mìng kờñ geh uă tai mờ gam kờñ bơkah den hơ̆ sồng kờñ geh khà nàng tăc mờ lơgar bơdìh uă rơlao”.

Bơh broă sền gròi tus tơngu me “Tam kơphe ngăc ngar”, ồng Lê Đình Tư, Lam bồ Suơn dờng Aeroco Coffee, ƀòn dờng Buôn Ma Thuột, càr Dăk Lăk pà git: ală nam pa do, tàm càr do neh geh ală broă lơh pơgồp bal nàng lơh geh bơta niam kơphe bơkah, mờ jơnau kờñ lơh geh phan niam, di pal mờ jơnau kờñ tăc mờ lơgar bơdìh. “Bol añ neh tus bal broă lơh kơphe bơkah bơh càr dê, tus tŭ do kơphe bol añ neh geh ờ uă drà kă bro kal ke dờp. Tŭ do bol añ kờñ geh dong kờl yal kơphe bơkah Buôn Ma Thuột đơs is mờ lơgar Việt Nam đơs bal. Hơ̆ là dùl tàm ală bơta tờm nàng ală cau jăk, ală hìu coh, cau hùc kơphe kờñ kơphe bơkah mờ geh tus bal, bơh tŭ hơ̆ he yal geh ală bơta phan neh geh lơh bơkah ngan bơh gar kơphe lơgar Việt Nam dê tus mờ dunia”.

Tàm Broă bơyai lơh chờ Kơphe Buôn Ma Thuột dơ̆ 9 kung neh bơyai lơh pơrjum cri bơyai kă bro phan ală lơgar mờ tơngu me “Tơrbŏ bal, tơnguh bơta bơkah bơh gar kơphe lơgar Việt Nam dê”. Pơrjum tơrgùm cri bơyai ală tơngu me nền nòn bè gah phan kơphe dê bè: Bơta drà kă bro kơphe tàm dunia, gơrềng tus mờ broă hùc dà kơphe; Broă rơndăp lơh ală broă dong kờl gơdờp mờ jơnau geh ai EUDR gơwèt mờ gah phan kơphe lơgar Việt Nam dê; Ală khà broă, jơnau geh ai gơwèt mờ tiah tam kơphe… Bal mờ hơ̆, ală cau ala măt kung cri bơyai bè gơnoar bơh mpồl lơh sa kă bro dê tàm broă tơnguh bơta bơkah bơh kơphe lơgar Việt Nam mờ bơ̆t khà măt kă bro kơphe Buôn Ma Thuột, tiah tus bơh kơphe dunia dê; Broă tăc kơphe mờ lơgar bơdìh, jơnau kơlôi bè drà kă bro bal mờ bơta gơkòl ngui kơphe tàm dunia tŭ do, gùng dà wèt tus drà kă bro gah phan kơphe lơgar Việt Nam in.

 

Cau mblàng Ndong Brawl/VOV Tây Nguyên

Viết bình luận

TIN CÙNG CHUYÊN MỤC