Broă dong kờl ờ sa priă 3 rơbô 320 tờm sơntìl kơnuh sơnơm Ngọc Linh dong kờl 40 hìu rơƀah, hìu pa lik klàs rơƀah kòn cau Sơdàng tàm 2 sàh Đăk Na mờ Văn Xuôi, geh kơnhoàl Tu Mơ Rông lơh tàm ngai 11 nhai 2 nam 2025.

Ồng Võ Trung Mạnh, Củ tịc Anih duh broă Làng bol kơnhoàl Tu Mơ Rông pà git, broă pà tờm sơntìl kơnuh sơnơm Ngọc Linh geh lơh bơh Broă lơh jăt jơnau kờñ dà lơgar tơrmù rơƀah kơl jăp dong kờl lơh sa jăt broă lơh geh kwơ mờ kờp jơh priă lơh mờr 1 tơmàn đong. Jơh ală tờm sơntìl kơnuh sơnơm Ngọc Linh dong kờl làng bol neh geh ờng 1 nam lài, tơl pràn ờ gơtìp kòp mờ gam hòn gơs niam. Tơnơ̆ mờ tŭ dờp tờm sơntìl, 35 hìu làng bol kis tàm sàh Đak Na mờ 5 hìu làng bol kis tàm sàh Văn Xuôn geh kwang bàng chài gah lơh sa suơn sre bơto sồr tam, sơnka sền gàr tàm tiah mƀur chi brê dờng hờ đang bơnơm Ngọc Linh.