Kon Tum lơh ngan tơn jơh hìu lơh ing ai làng bol in
Thứ hai, 14:18, 09/06/2025
Cau mblàng K’Hạnh/VOV Tây Nguyên
Cau mblàng K’Hạnh/VOV Tây Nguyên
VOV4.K’Ho- Tus tŭ do, càr Kon Tum neh tàm jàu pơgăp 2 rơbô nơm hìu ơm pa ai làng bol in, pơgồp bơnah dong gĭt nđờ rơbô nă làng bol lik bơh rài kis ơm tàm hìu lơh ing, hìu ồm sèt nhăt dà mìu.
Tàm hơ̆, geh rlau 1 rơbô 500 nơm hìu lơh pa mờ mờr 450 nơm hìu geh lơh niam wơl. Kon Rẫy mờ Đăk Hà là 2 kơnhoàl sơn rờp lơh sir jơnau kờñ do. Càr ai jơnau kờñ tus lồi nhai 6 rơ̆p lơh sir broă tơn jơh hìu lơh ing ai 2 rơbô 740 hìu bơnhă làng bol in. Mơya, tŭ do gam 786 nơm hìu gam lơh, uă ngan tàm ală kơnhoàl Đăk Glei, Kon Plông, Tu Mơ Rông.
Broă lơh gam uă kal ke bè ờ hềt tam pà rlau 5 tơmàn đong dong kờl hìu ơm ai cau geh màng mờ Dà lơgar in; bàr pe mpồl lơh broă ờ pơyoa 13 tơmàn đong neh hơ; Đăk Glei ờ tơl cau lơh broă dong kờl. Bơdìh hơ̆, tàm tŭ kờp sền, gơlik geh tai rlau 1 rơbô 300 hìu bơnhă geh jơnau kờñ geh dong kờl bè hìu ơm nàng bè ờs wơl rài kis jŏ jòng.
Viết bình luận