Ngai dờp Sơlong (Huy hiệu) 55 sơnam Đảng, ồng Nguyễn Hữu Quyền ơm tàm jơnum làng bol tiah drà 5 Tân Thành, sơnah ƀòn Buôn Ma Thuột ờ gơtùi mpồl geh bơta ngoh rơngăc tŭ kah bè ală nam nhai tam lơh. Nam 1970, ồng mŭt tàm tiah tam lơh mờ geh tơmŭt Đảng tàm gùl dùl bă sươn prìt tàm ù lơgar Campuchia dê. Mìng 5 ngai tơnơ̆, cau dùl mpồl bal yal tơnggĭt ồng mŭt Đảng neh phi să. Jơnau sơn tơm să bơh cau đảng viên tŭ hơ̆ dê pơgồp bal mờ tiah tam lơh, mờ cau dùl mpồl bal mờ kơnòl broă tam lơh.

Tơnơ̆ rài tam lơh ală lơgar, ồng Quyền pơn jăt tai tus bal lơh broă mờr 40 nam. Rlê rlô broă bơh nam 2008, ồng kung gam tus bal lơh broă tàm ƀòn lơgar, geh 4 tơngai lơh kơnòl broă Phó Bí thư Chi bộ mờ uă nam lơh Lam bồ mpồl cau dờng sơnam thôn. Tàm sơnam rlau 80, ồng Quyền đơs là, rlô lơh broă ờ gŏ di là rlô kơnòl ờ; cau đảng viên, tŭ gam geh bơta pràn mờ geh tŭ, kung gam kờñ pal lơh niam gơnoar broă, kơnòl broă mờ mpồl mờ mpồl bơtiàn.

“Jăt Đảng, dong klàs jơi bơtiàn mờ neh geh rài kis lơngăp lơngai is, khăt gơboh is. Hơ̆ là bơta chờ hờp dờng ngan. Bơh bơta đơng lam Đảng dê, rơnàng tŭ do đòm jăt bèp ồng, tàm pơn jăt nàng lơh bè lơi lơh niam geh bơhiàn bơh Đảng dê nàng bơ̆t bơtàu dà lơgar he jăt Jơnau lơh nền tàm pơrjum dờng 14 Đảng dê sồr là tus nam 2045, dà lơgar he rơ̆p gơgơs là dùl dà lơgar bơtàu tơngguh”.

Dilah jơnau sơn tơm să ồng Nguyễn Hữu Quyền dê geh cih tềl tàm gùl tiah tam lơh, den bơta dòn bơh đảng viên Y Hạ Niê Kdăm dê, tàm jơnum làng bol tiah drà 2 Tân Tiến, sơnah ƀòn Buôn Ma Thuột, geh bơ̆t bơtàu geh bơh ală nam nhai tơrgùm lòt tus tiah đah tô dà lơgar tŭ pa 8 sơnam.

Bơh nam 1955, ồng Y Hạ Niê Kdăm geh bơsram tàm Klờng Jơi bơtiàn Dà lơgar mờ neh 3 dơ̆ geh tìp Wa Hồ. Tơnơ̆ do, ồng lơh cau gĭt wă jrô tàm lơgar Campuchia, hơ̆ sồng rê wơl đềt mềr lơh broă uă nam mờ bơto bơtê bal mờ lơh broă kơlôi sơnơng bơto bơtê kơnòm bơsram jơi bơtiàn tàm Dăk Lăk. Bơh tơl anih lơh broă, ồng Y Hạ Niê Kdăm sùm tơngkah is he sền gàr nùs nhơm bơh cau đảng viên dê mờ jàu pơrdờn bơta pin dờn hơ̆ ai rơnàng tơnơ̆ in.

“Tàm tŭ tơngai pa, rài pa, gơ wèt mờ đảng viên pal pơnđơl ai bơta niam Đảng dê in. Lơh ngan sền gàr nùs nhơm cau Kộng sản dê, cau đảng viên bơh Đảng dê”.

Ală jơnau bơh ồng Nguyễn Hữu Quyền, Y Hạ Niê Kdăm dê pà gŏ, gơ wèt mờ uă đảng viên dờng sơnam, sơnam deh digơlan lơh tam gơl gơnoar broă, broă lơh, mơya ờ gơtùi lơh roh tĕ kơnòl mờ mpồl bal mờ mpồl bơtiàn.

Jơnau lơh nền tàm pơrjum 21 bơh Mpồl Duh broă Đảng Dà lơgar khoă XIII ngai 16/06/2022 cih loh mpồl ală cau đảng viên là cau tờm kwơmàng lơh nền pràn jak lơh broă đơng lam, pràn tam lơh bơh mpồl đảng kâp hơđơm dê; sồr tơl nă đảng viên gĭt wă is bơsram tàp, lơh lài, lơh krơh, sền gàr nùs nhơm mờ lơh jăt jơnau sơn tơm să tŭ mŭt Đảng.

Gơ wèt mờ đảng viên rê rlô lơh broă, tŭ gam pràn, mờng chài mờ bơta jơh nùs jơh tồr, broă lơh jăt niam gơnoar broă digơlan sơnđờm bơh ală bơta rềp mềl ngan; tus bal pơrjum chi bộ, tă pơgồp jơnau đơs broă lơh tàm tiah làng bol ơm kis, hòi jà làng bol lơh jăt jơnau lơh nền, gùng dà broă lơh, halà bơto yal wơl mờng chài ai rơnàng kơnòm să in.

Ală tă pơgồp hơ̆ ờ nggồr nggàc, mơya là broă cau đảng viên pơn jăt tai sền gàr jơnau sơn tơm să mờ Đảng tàm rài kis ờs mờng pah ngai. Mò Tào Thị Nga, lài do kwang bàng Anih Sền swì jăt sền Làng bol càr Dăk Lăk, đơs là bơta lơh lài, lơh krơh lài jơh pal sơnđờm bơh broă prăp gàr di jơnau sơn tơm să mờ Đảng mờ làng bol.

“Añ ờ tŭ lơi gơtùi hŭi tŭ ntàu tềng hơđơm nha bồng bi Đảng dê añ dan hơ jơh dùl rài kis pơnđơl ai Dà lơgar in, ai làng bol in, ai Đảng in. 45 sơnam do, să tờm añ kơlôi, cau đảng viên bè bol hi pal pơnđơl bơsram tàp mờ lơh krơh nàng rơnàng tơnơ̆ do lơh ngan là iăt kơno, brồ să jăt bàn tŭ tơngai, dipal nàng dà lơgar he brồ să tàm rài pa”.

Tàm rài tam lơh mờ cau sò tơm, kơnòl cau đảng viên dê geh lòng tàm tiah tam lơh. Tàm rài ring lơngai, bơta lơh lài, lơh krơh geh tơnggŏ bơh ală broă rềp mềl mờ rài kis: đơs gơlòt jăt bal mờ lơh, rềp làng bol mờ kơnòl mờ mpồl bơtiàn.

Jơnau lơh nền tàm pơrjum 21 Mpồl Duh broă Đảng Dà lơgar khoă XIII dê geh jơnau sồr tơngguh uă bơta niam mpồl ală cau đảng viên pơgồp bal mờ bơsram tàp, lơh lài, lơh krơh mờ gàr bơta gĭt gơ̆p đềt mềr mờ làng bol. Jơnau đơs pơndŭt sồ 58 ngai 26/06/2026 bơh Bộ Chính trị khoă XIV dê pơn jăt tai lơh jăt Jơnau lơh nền tàm pơrjum 21 dê, đơs sùm bơ̆t bơtàu mpồl ală cau đảng viên lơh geh jơnau sồr tàm bơta pa.

Mờ ală đảng viên dờng sơnam tàm càr Dăk Lăk, jơnau sơn tơm să mờ Đảng geh tơn dŏ jòng bơh ală broă lơh loh làng, bơh pơrjum chi bộ, tă pơgồp jơnau đơs tàm broă bal tus bơto yal wơl mờng chài ai rơnàng kơnòm in.