Mpồl jòi rồ, tơrgùm ƀồc ntìng cau ling chơ̆t màng gơwèt Mpồl Đơng lam ling klàng càr Khánh Hoà pơgồp bal mờ ală mpồl lơh broă bal mờ gơnoar atbồ sàh bơyai lơh jòi rồ tàm pôs đồng kăc màng CK35, thôn Từ Thiện, sàh Phước Dinh.

Bơh tŭ hơ̆, mpồl lơh broă geh gơnoar gŏ, tơrgùm geh 5 ƀồc ntìng cau ling chơ̆t màng ờ hềt git đal măt tàm tiah CK35; mờ tơrgùm geh tai 4 bơtô ƀồc geh jơnau yal tàm ală tiah krơi is tàm sàh. Ală mẫu sinh phẩm bơh 5 ƀồc ntìng neh geh ai nàng drơng tàm broă đal git ADN. Tơnơ̆ mờ tŭ neh rồ tơrgùm, ală ƀồc ntìng geh cèng tus Anih kah kơlôi cau ling chơ̆t màng sàh Phước Dinh; sàh bal mờ mpồl lơh broă geh gơnoar pơn jăt tai lơh jăt ală sră nggal di jăt jơnau geh ai, mờ rề ơnàng tiah jòi rồ tàm ală tiah geh jơnau yal bè tiah tơ̆p ƀồc cau ling chơ̆t màng.