Bàr nă kwang đơng lam bồ đơs nền, Việt Nam mờ Timor-Leste geh uă bơta pràn nàng rề ơnàng lơh broă bal tài bơta kuơ bơh làng bol 2 lơgar dê mờ tă pơgồp ai ring lơngai, bơtàu tơnguh kơ̆ kơljap jŏ jòng sùm bơh tiah do dê.

Bàr gah ring bal pơn jat tai gàr kơ̆ bơta pin dờn chính trị, sơlơ tàm cribơyai mpồl kwang bàng kâp dờng, lam lơh jat geh cồng nha ală jơnau ring bal neh kĭ hơ. Bè lơh sa, bàr lơgar rơp sồr gờñ ring bal mờ lơh jat Jơnau kĭ hơ Kă bro phan 2 gah, mờ kung rề ơnàng lơh broă bal tàm ală gah phe, phan lơh gơs bơh suơn sre, phan tàm dà, tàñ mai, viễn thông, tam gơl sồ, phan bơna mờ broă drơng ala. Thủ tướng lơgar Timor-Leste sồr Việt Nam pơn jat tai tac ală bơta phan geh bơta pràn, is ồn là phe, pơgồp bơnah gàr tơl kòi phe ai lơgar do in. Bàr gah kung ring bal sơlơ tơnguh lơh broă bal ling klàng, sền gàr lơngăp lơngai, bơto bơsram, bơto bơtê cau lơh broă, niam chài, lòt nhơl, tàp pràn să jan mờ tam pà bal mờng chài bơtàu tơnguh lơh sa suơn sre kơnhăp kơ̆.