Jờng rơ ală tă pơgồp kuơmàng bơh Mpồl duh broă dê tàm tơngai lơh broă bơh nam 2021 tus nam 2026, ngan là tàm tơn jơh 40 nam tam gơl pa, bơt bơtàu Sră nggal pơrjum dờng dơ̆ XIV, ồng Tô Lâm, Tổng Bí thư, Chủ tịch lơgar đơs nền, Mpồl duh broă neh tam gơl pa broă lơh, lơh jat kơnòl broă chính trị, sơn đờm lơ mơ ală broă dờng, broă kal ke, jal mhar, drơng di tŭ Mpồl duh broă Đảng Dà lơgar, Bộ Chính trị. Mpồl đơng lam Đảng dà lơgar.

Đơs sùm, broă lơh cribơyai jơnau geh kuơ dờng màng ngan tàm broă lơh kac màng, ồng Tô Lâm, Tổng Bí thư, Chủ tịch lơgar sồr, Mpồl duh broă kờñ pal kơlôi sơnơng jrô rlau tai bè Chủ nghĩa xã hội, broă lơh mờ gơl gùng brồ guh tus Chủ nghĩa xã hội tàm Việt Nam tàm bơta tam gơl bơh tŭ tơngai dê. Pal rơcang lài rlau, ngac ngar rlau, mut jrô tàm ală broă tờm, lòt song tàm ală bơta gơ kòl, bơta ờ niam pa bơh bơtàu tơnguh pa dê, bơh hơ̆ pơlam di tŭ, geh cồng nha ai ală jơnau lơh nền bơh Đảng dê. Di dơ̆ do, ồng Tô Lâm, Tổng Bí thư, Chủ tịch lơgar kung sồr, ală mpồl, ƀộ, gah broă lơh dà lơgar, càr, ƀòn dờng pơn jat tai sền gròi, lơh gơlik bơta niam nàng Mpồl duh broă Cribơyai jơnau dà lơgar lơh gơs niam kơnòl broă he dê; sền broă tơn jơh ngan ngồn, yal jơnau tơnggit, pơgồp bal kơlôi sơnơng cribơyai jơnau là kơnòl chính trị he dê, pơgồp bơnah bơt bơtàu rài cribơyai jơnau kac màng Việt Nam pa, cèng bơta niam chài tàm rài bơtàu tơnguh pa.