Jăt rơndăp ù tiah, rơndăp broă lơh geh bă ù ơnàng pơgăp 200 lồ, kờp jơh priă bơcri 139 tơmàn đong mờ rơ̆p geh lam lơh jăt tơl tŭ tơngai dipal mờ pràn jak bơcri priă kung bè ală bơta geh mùl màl. Jăt cau tờm bơcri priă, rơndăp broă lơh wèt tus bơ̆t bơtàu broă lơh tam mờ lơh gơlik phan lơh sơnơm niam uă, ngui măy mŏk pa nàng kờñ lơh gơlik ală phan bơna lơh geh ală jơnau sồr niam jăt jơnau sồr mờ jơnau kờñ drà kă bro phan khăt gơboh dê dê. Ồng Lê Minh Thông, Chủ tịch Anih duh broă Làng bol sàh Vĩnh Thạnh pà gĭt, Đan Sâm là tờm chi lơh sơnơm geh kwơ, geh ngui uă ngan tàm gah lơh sơnơm yô yau mờ geh tơl pràn bơtàu tơngguh uă.

“Rơndăp broă lơh do tus mờ ƀòn lơgar pờ gơlik tŭ niam pa tàm tam gơl rơndăp tăp sèng chi tam bơh broă lơh sa sươn sre mìng lơh is sa is tus broă lơh sa sươn sre măy mŏk lơh gơlik phan niam uă bal mờ ală anih lơh gơlik đah mpồl lơh sa kă bro mờ làng bol. Bơh ndo kung bơsong broă lơh broă sa mờ lơh broă tàm ƀòn lơgar in”.

Ồng Lê Quang Hùng, Kwang Lam bồ Sờh Lơh sơnơm Gia Lai, pà gĭt Jơnau lơh nền tàm pơrjum sồ 72 Bộ Chính trị dê mờ Broă rơndăp lơh sồ 06 Tỉnh ủy càr Gia Lai dê bè bơtàu tơngguh gah lơh sơnơm tơngai bơh nam 2026 – 2030 neh gĭt nền bơtàu tơngguh tờm chi lơh sơnơm là dùl tàm ală kơnòl broă ai lài. Tài bè hơ̆, broă lam lơh rơndăp broă lơh tam tờm chi lơh sơnơm tàm Vĩnh Thạnh dipal mờ jơnau lơh nền bơtàu tơnguh càr Gia Lai dê mờ pơlam gùng bal bơh jơh gùt lơgar dê.

“Tờm Đan Sâm là dùl tờm chi lơh sơnm kwơ ngan mờ cèng wơl uă bơta kwơ ai pràn kơldang in. Tŭ do tàm dunia, uă lơgar neh ngui nàng sơm ală bơta kòp tàm să bè gùng mhàm plai nù, gah kòp cau ùr. Do kung là rơndăp broă lơh bơh sơnrờp tàm Việt Nam tam tờm Đan Sâm mờ bă ù dờng. Să tờm làng bol Vĩnh Thạnh kung rơ̆p geh dờp kwơ bơh tiah do sơl”.

Broă lam lơh rơndăp broă lơh tam mờ lơh gơlik phan niam tờm chi lơh sơnơm Đan Sâm tàm sàh Vĩnh Thạnh, càr Gia Lai rơ̆p pơgồp bơnah jòi lơh geh cồng nha bơta pràn tờm chi lơh sơnơm ƀòn lơgar dê. Bơh hơ̆, lơh gơlik gơn kơnờm bơtàu tơngguh lơh sa, bơsong broă lơh, rơhời gơgơs ală anih lơh gơlik tờm chi lơh sơnơm kơnhăp jŏ gơ jăt bal mờ jơnau kờñ bơtàu tơngguh gah lơh sơnơm mờ broă lơh sa sươn sre măy mŏk pa bơh càr Gia Lai dê.