Tơnơ̆ tŭ să tờm lòt sền ù tiah ngan ngồn tàm Ƀlàng rơndeh ồs Đồng Đăng, Lạng Sơn, Tổng Ƀí thư ồng Tô Lâm đơs nền, lơh broă bal Việt Nam mờ Lo tàm gah broă gùng rơndeh ồs là jơnau kờñ mờ là tŭ niam, dilah lơh jăt niam, ătbồ broă di, den do rơ̆p là dùl tàm ală ù tiah lơh broă bal geh kwơ ngan ngồn, geh cồng nha đah bàr lơgar tàm uă nam tus.

Tơngai tus, nàng lam lơh geh cồng nha broă bơcri priă ală gơl gùng rơndeh ồs, Tổng Ƀí thư đơs là, pal bơsong jơnau lùp hòi tơrgùm priă bơcri, bơ̆t bơtàu mpồl lơh broă hòi tơrgùm priă bơcri li la mờ kơnhăp jŏ, pơgồp bal uă bơta pràn krơi is. Sền ngăc bè jơnau digơlan gơgơs gơl gùng jun ntrờn phan bơna kă bro ƀươn soh, Tổng Ƀí thư sồr bơtàu tơngguh ală gơl gùng rơndeh ồs pal lòt bal mờ rơndăp ù tiah ală tiah lơh sa mờ măy mŏk, tiah drà, tiah tờm logistics mờ anih lơh gơlik phan jăt gùng kềng lơh sa, nàng kờñ lơh gơlik geh ală bơta kwơ pa mờ tơngguh uă bơta kwơ gơguh tai tàm lơgar.