Phó Thủ tướng sồr tơnguh pràn lơh, pơnđơl ai rơndeh in tơrlòng lòt lài mờ ngai 2/9 mờ lơh gơs gùt gơl gùng tàm nam do. Rơndăp broă lơh bơnah 2 lòt gan ù tiah jơnhoa đah 2 càr, bơh Ƀộ Bơ̆t bơtàu là cau tờm ătbồ, Mpồl Ătbồ rơndăp broă lơh Gùng rơndeh ồs lơh cau tờm bơcri priă, jòng 37,5 kơi sồ. Jăt cau tờm bơcri priă, mìu dà tih jŏ jòng tàm nam 2025, ù tiah ờ ƀươn soh, uă rbàng brong bal mờ tam gơl giă ñiên liệu neh lơh gơrềng tus tơngai pơrgon lơh, tŭ do rơ̆p lơh geh pơgăp 65% bơnah broă. Puan nơm brong gan bơnơm geh Ea Trang 1, Ea Trang 2, Phượng Hoàng mờ Chư Te mờ kờp jơh jòng 5.550 thơk neh tờ bluh, gam lơh ƀê tông bơdìh brong mờ crăp ală măy mŏk. Tềng đăp bơta lơyài ngan tàm rơndăp broă lơh do, Phó Thủ tướng ồng Hồ Quốc Dũng sồr sơrbăc mhar tơnguh pràn, gờñ ai rơndeh in tơrlòng lòt nàng ndrờm bal jơh gùt gơl gùng.

Tàm dơ̆ lòt sền, đơng lam càr Dăk Lăk dan mờ Dà lơgar ai gơnoar bơcri tai pơgăp 5 kơi sồ gùng tàm tơrbŏ gùng rơndeh lòt mhar Khánh Hoà – Buôn Ma Thuột mờ Gùng dờng Đah măt tơngai Lik Mŭt, gơl gùng tàm tơrbŏ lòt gan kơnhoàl ù tiah ƀlàng rơndeh par Buôn Ma Thuột nàng kờñ tơngguh uă cồng nha ngui jơh gùt gơl gùng.