Àng drim gờñ tàm ƀòn Tơ Drăh, sàh Bờ Ngoong, càr Gia Lai, kwang bàng Kwang àng sàh tus còp hìu nhă ồng Bái, 43 sơnam, kòn cau Bơnhàr nàng lùp lăp bè jơnau lơh broă tàm kàl lơh sa, bơta pràn kơl dang să jan mờ broă bơsram sră bơh ală oh kòn dê. Rơlao dùl nam lài, ồng Bái neh geh tŭ tài pin dờn mờ lòt jăt yàng tìs hơ̆ là yàng ờ ngan “Bana Đêgar Kon Plông” geh ală cau pơlơ̆ dră lơh gơs nàng hòi jà bơchồt làng bol.

Ồng Bái yal wơl, tŭ rơ̆p geh, ală cau do mblàng yal do là “yàng krơi is kòn cau Bơnhàr dê” neh geh dờp den tàng uă cau pin dờn mờ lòt jăt bal. Mìng tus tàm tŭ gơnoar atbồ sàh bal mờ mpồl kwang àng mblàng, yal loh bè nùs nhơm bơh mpồl cau pơlơ̆ dră dê, kờñ sơgràm gah jăt yàng nàng tam dră bơh ală cau lam bồ dê hơ̆ sồng ồng git là să tờm ồng neh gơtìp sơgràm. “Yàng ờ ngan Bana Kon Plông là tìs bloh. Tìs là tài yàng do lơh tam cah is jơi bơtiàn, Dà lơgar he ờ ai jăt. Añ git tìs là añ sơrbì mơ. Kon cau Bơnhàr mờ Jrai tàm tiah añ geh dà lơgar sền gròi uă ngan, tŭ gơtìp kòp tê jê să ndrờm geh sră sền gàr gah lơh sơnơm”.

Jăt anih lơh broă kwang àng yal, bơh nhai 7 tus nhai 9 nam 2025, mpồl jăt yàng ờ ngan “Bana Đêgar Kon Plông neh bơchồt geh rơlao 350 nă cau tàm 22 ƀòn gơwèt 7 sàh tàm càr Gia Lai lòt jăt yàng bal. Tàm broă lùp khào nàng git, ală cau do neh lơh geh mpồl lơh broă nền nòn ngan, kơl dìng mờ broă jăt yàng nàng mblàng yal nùs nhơm lik dră is, bơchồt tam cah is jơi bơtiàn, tam dră mờ gơnoar atbồ mờ lam làng bol tă priă ờ di mờ adăt boh lam nàng drơng tàm broă lơh pơlơ̆ dră.

Thượng tá Phan Thanh Hải, Phó Kwang lam bồ cơl dŭ lơh broă Lơngăp lơngai tàm dơlam is, Kwang àng càr Gia Lai pà git, mùl màl “Bana Đêgar Kon Plông” là mpồl jăt yàng geh lơh bơh mpồl “Tin lành Đêgar” dê geh ală cau tàm mpồl Fulro kis tàm lơgar bơdìh sồr lơh nàng lơh geh jơnau ờ niam lơngăp lơngai tàm ƀòn lơgar. Tàm poh nhai 05 nam 2026, Kwang àng càr Gia Lai neh yă dơ̆ lơh tìs nàng lùp khào bè broă “Tam dră mờ broă tam klăc bal”, kŭp geh ờ uă cau tờm tàm mpồl jăt yàng ờ ngan do. “Ală cau ờ niam do hòi jà bơchồt mờ bơtàu tơnguh tàm tiah làng bol jơi bơtiàn ờ gal cau nàng lơh gơs mpồl geh nùs nhơm dră wơl, tam dră mờ gơnoar atbồ, nàng sơgràm, bơchồt, ai jơnau yal tơngit nàng mpồl dră wơl hờ lơgar bơdìh in, đơs ờ di mờ bơta lơngăp lơngai chính trị, bal mờ rài kis làng bol dê, sền do là cơng tàng yă lơgar Việt Nam tìs mờ gơnoar làng bol lơh tờm, gơnoar tờm kòn bơnus dê, nàng lơh gơmù gơnoar bal mờ bơngă pin dờn bơh dà lơgar he dê”.

Tàm broă tam dră, càr Gia Lai neh lơh ngan lơh glài ală cau lam bồ, cau tờm. Bal mờ hơ̆, broă hòi jà làng bol, mblàng, bơto pơlam cau neh gơtìp tìs gùng geh sền gròi ngan nàng làng bol rê pơrjum niam wơl mờ mpồl jăt yàng ờs mờng, di mờ jơnau pal jăt tàm adăt boh lam dê. Tàm ală ƀòn, kra ƀòn, cau geh bơngă pin dờn, Bí thư Chi bộ, Kwang atbồ thôn neh gơs cau tờm tàm broă mblàng yal, hòi jà làng bol đal git loh nùs nhơm ờ niam bơh ală cau ờ niam sơgràm gùng jăt yàng. Ồng Đinh Chroh, Bí thư Chi bộ mờ kwang làm Kwang atbồ thôn Tơ Drăh, sàh Bờ Ngoong, càr Gia Lai pà git: “Añ đơs mờ làng bol là lơgar Việt Nam 54 jơi bơtiàn oh mi. Ờ gơtùi tam cah is kòn cau Bơnhàr, kòn cau Jrai ha là cau Yoan gơs ală jơnau sơnđan là “yàng is”, lơh ờ di mờ mpồl tam klăc jơi bơtiàn dê”.

Đại tá Phạm Hữu Trường, Phó Kwang lam bồ Kwang àng càr Gia Lai pà git, tam dră mờ ală broă lơh sơgràm jăt yàng nàng lơh ờ niam sùm geh Đảng ủy, Mpồl Lam bồ Kwang àng càr ai là kơnòl broă tờm tàm broă gàr niam lơngăp lơngai dà lơgar, gàr kơl jăp ù tiah tàm càr. Bơdìh mờ ală gùng dà broă lơh nàng kơrian bơh gờñ, bơh ngài broă lơh gơs mpồl, bơtàu tơnguh mpồl lơh broă tờm nàng bơchồt làng bol, mpồl kwang àng gam lơh pràn broă tam dră tàm gah nùs nhơm; tơnguh gơnoar bơh kra ƀòn, cau geh bơngă pin dờn mờ geh bal ală cau neh geh tŭ tìs gùng mơya neh kah rê wơl. “Tam dră, bơsong jơh gơwèt mờ broă lơh nàng geh wơl mpồl Furo, Tin lành Đêgar tàm măt sơnđan là Bana Đêgar Kon Plông neh pơgồp bal tàm broă gàr kơl jăp lơngăp lơngai ƀòn lơgar tàm càr. Tàm hơ̆ uă ngan bơh tàm broă tam dră, neh kơrian geh ờ uă cau tờm gơs mpồl lơh broă tờm tàm broă lơh gùt làng bol sền gàr lơngăp lơngai Dà lơgar, lam uă làng bol neh tìs gùng rê pơrjum wơl mờ mpồl jăt yàng ngan bè ờs”.

Dơ̆ tam dră mờ ală mpồl sơgràm broă jơi bơtiàn, jăt yàng nàng tam dră lơh aniai tàm Tây Nguyên đơs bal mờ càr Gia Lai đơs is geh ai là gam jŏ jòng, kal ke. Tài ală cau pơlơ̆ dră sùm jòi tơl bơta nàng tam gơl gùng dà broă lơh, sơgràm mờ bơta ờ git wă bơh ờ uă làng bol dê nàng bơchồt jơnau ờ niam, lơh tam cah is mpồl tam klăc dờng jơi bơtiàn.

Mơya, mờ broă tus bal pràn bơh mpồl lơh broă geh gơnoar dê, bal mờ broă dùl nùs bal bơh kấp ủy, gơnoar atbồ bal mờ làng bol ƀòn lơgar dê, ală jơnau đơs ờ di, ờ ngan, sơgràm gùng jăt yàng rơ̆p ờ gam geh bă ù nàng kis; bơta lơngăp lơngai rơ̆p pơn jăt tai geh gàr kơl jăp tàm tiah brê bơnơm dờng Tây Nguyên dê.