Đơs sồr lơh tàm Pơrjum, ồng Tô Lâm- Tổng Bí thư, Chủ tịch lơgar đơs sùm, mut tàm rài bơtàu tơnguh pa bơh Dà lơgar dê, lơh broă mờ lơgar ndai bơh lơgar Việt Nam dê tơngŏ bơta tam gơl pa bồ tơngoh kơlôi sơnơng, tơngŏ loh bơh ală jơnau đơs dờng cèng bơta sền gĭt bồ tơngoh. Lơh broă mờ lơgar ndai geh sền gĭt là kơnòl broă “tờm ngan, sùm sùm” gàr gơnoar broă lam lài tàm sền gàr dà lơgar bơh gờñ, bơh ngài mờ bơceh lơh muh mat ală lơgar dê ƀuơn ngan ai bơtàu tơnguh Dà lơgar. Lơh broă mờ lơgar ndai pal bơtàu tơnguh ndrờm pal mờ să bồ, gơnoar broă mờ bơhiàn niam chài is jơi bơtiàn dê, pơgồp bơnah đơs nền rùp hin dùl Việt Nam lơngăp lơngai is, lơh tờm, ring lơngai, lơh broă bal mờ geh kơnòl.

Bơnàng jă bơh lơh broă mờ lơgar ndai là lơh tờm broă dờng màng mờ lơh pràn is jơi bơtiàn, gàr niam uă ngan rlau jơh bơta kwơ dà lơgar mờ jơi bơtiàn dê, ai cau lơh anih tờm bơh tơl broă lơh mờ sền tă pơgồp ai mpồl bơtiàn ală lơgar dê là kơnòl broă. Mờ lơh broă mờ lơgar ndai kung là broă lơh bơh gùt Đảng, gùt làng bol, lơh jat niam bơta pràn tơrgùm bal bơh jơh ală anih lơh broă chính trị bơh Dà lơgar dê.