Mho òr (11/06), Tỉnh ủy càr Khánh Hoà bơyai lơh pơrjum yal jơnau lơh nền tàm pơrjum dê bè broă kwang bàng. Jăt mờ hơ̆, ồng Tạ Hồng Quang, kwang bàng Tỉnh uỷ, Bí thư Đảng ủy, Chủ tịch Mpồl duh broă Làng bol sơnah ƀòn Nha Trang geh ntrờn, pồ at gơnoar broă Kwang Lam bồ Mpồl pơgồp jơnau đơs mờ Dong broă Tỉnh ủy càr Khánh Hoà.

Đơs tàm dơ̆ jào kơnòl broă, ồng Hồ Xuân Trường, Phó Bí thư Duh broă sùm Tỉnh ủy càr Khánh Hoà pà git, broă pồ tơl gơnoar broă Lam bồ Mpồl pơgồp jơnau đơs mờ Dong broă Tỉnh ủy nàng di pal mờ jơnau đơng lam, sồr lơh broă mpồl pơgồp jơnau đơs mờ Dong broă, rơcang, tam dră mờ sa kuề sa koà, hoàc huơr, ờ niam mờ lơh niam adăt boh lam tàm tơngai pa. Phó Bí thư Duh broă sùm Tỉnh ủy càr Khánh Hoà sồr ồng Tạ Hồng Quang mhar at tê tàm broă lơh, tơnguh nùs nhơm kơ̆ dơn chính trị, tơnguh uă cồng nha pơgồp bal đah ală anih lơh broă, mpồl lơh broă gơrềng bal nàng lơh gơs niam kơnòl broă geh jào.