Bơh điện thoại ngăc ngar mìng ngui nàng iăt cau hòi mờ hòi cau in, mò H’Bé Êban, ơm tàm ƀòn Tah B, sàh Cuôr Đăng, càr Dăk Lăk, tŭ do neh gĭt jòi gĭt jơnau yal kham, sơm kòp ờ sa priă mờ lơh jat bàr pe sră pơ àr gơnoar atbồ tàm internet. Bơta tam gơl sơnđờm bơh ală dơ̆ kwang bàng ƀòn tus tơn tàm hìu bơto pơlam, dong mò lơh kwèng mờ măi mok.

Ƀòn Tah B, sàh Cuôr Đăng, càr Dăk Lăk geh rlau 340 hìu bơnhă, tàm hơ̆ geh rlau 90% là làng bol jơi bơtiàn dồ ết nă cau. Kơryan dà đơs bal mờ nùs nhơm ờ khin ngui măi mok neh lơh uă cau gơtìp kal ke tŭ kờñ ngui phan sồ. Cau tàm Mpồl măi mok mpồl bơtiàn tus tơn tàm hìu, bơto pơlam mờ dà kòn cau Rơđê mờ lơh tơn tàm điện thọai bơh làng bol dê. Bi H’Gói Niê, Lam bồ Mpồl măi mok mpồl bơtiàn ƀòn Tah B pà gĭt: “Añ tus tơl nơm hìu bơto pơlam làng bol in ngui điện thoại, pờ phan ngui VNeID, cih mật khẩu, sồ điện thọai mờ lơh ală broă lơh lơh sră pơ àr tàm internet. Añ bơto pơlam nàng làng bol in gĭt lơh is, mơkung mblàng yal nàng tơl nă cau in gĭt tơnơ̆ do uă sră pơ àr gơtùi lơh tơn tàm điện thoại”.

Bơta kơ̆ nùs mờ jơh nùs jơh tồr bơh ală mpồl măi mok dê gam pơgồp bơnah lơh tam gơl broă lơh gĭt mờ jơnau yal, lơh ală sră pơ àr gơnoar atbồ mờ lơh geh bơta mờng kwèng ngui ală bơta kwơ sồ. Mò H’Kơm Êban, lam bồ ƀòn Tah B, đơs: “Làng bol tàm ƀòn neh gĭt ngui điện thọai ngăc ngar, pờ phan ngui VNeID, quét mã QR, tơm priă điện tử mờ lơh sră pơ àr gơnoar atbồ tàm internet. Ờ mìng gĭt mờ măi mok lơm, làng bol gam hời rơ hời bơsong ală broă lơh lài do pal kơnờm cau ndai dong kờl”.

Bơh kấp hơđơm, srơh “Jơh gùt làng bol bơsram sồ” gam geh lam lơh làm bă tiah tàm càr Dăk Lăk. Rlau 2 rơbô Mpồl măi mok mpồl bơtiàn mờ mờr 12 rơbô nă cau neh geh tơnggơs, dong kờl làng bol gĭt mờ broă drơng ala internet, tơm priă ờ ngui priă mat mờ ală bơnàng jă sồ kờñ pal geh. Ồng Bùi Thanh Toàn, Lam bồ Sờh Jak chài mờ Măi mok càr Dăk Lăk pà gĭt, bơta tus bal bơh ală mpồl măi mok sồ mpồl bơtiàn, gam pơgồp bơnah tơnguh uă bơta pràn jak sồ bơh làng bol dê: “Tam gơl sồ lài ngan pal sơnđờm bơh broă tam gơl bồ tơngoh kơlôi sơnơng mờ broă lơh. Tơngai pa do, mpồl đơng lam bồ càr bal mờ ală cau geh bơngă pin dờn tàm ƀòn lơgar neh tus bal tơn, lơh gơrề uă srơh “Jơh gùt làng bol bơsram sồ” bơh 4 broă lơh tơrlòng lài: sàh sồ, sơnah ƀòn sồ, thôn halà ƀòn sồ mờ làng bol sồ. Uă tiah rcang lài ai ală broă lơh sồ tàm broă lơh atbồ mờ rài kis, lơh geh bơnàng jă ai tam gơl sồ bơh càr dê tàm tơngai tus.