Broă lơh tìp măt lơh kwèng mờ cau lơh cơng jơnau kah yau geh bàr bơnah “Bơhiàn Khin chơ̆t phi să” mờ “Cih tai jơnau đơs crih jờng rơ bơta khin cha jak chài”. Broă lơh neh lơh kis wơl nùs nhơm bơh Càr lơgar dê bơh ală ngai Jơh gùt lơgar tam lơh mờ cau sò tơm duh hồl ngan nam 1946, ling klàng mờ làng bol Hà Nội khin cha kơ̆ nùs tam lơh sùm tàm 60 ngai mang lơh ờ jai jơh jơnau jòi kai “tam lơh mhar, jai pha mhar” bơh bol sò tơm Tây dê, sền gàr niam lơngăp lơngai ai anih lơh broă Đảng, Chính phủ dê in rŭc rê tus tiah tam lơh, ai tơl bơta nàng jơh gùt jơi bơtiàn mŭt tàm dơ̆ tam lơh jŏ jòng kal ke ngan dră wơl cau sò tơm. Cih tai ală pang jơnau kah yau khin cha jak chài hơ̆, ngan là ală làng bol Hà Nội, ală cau ling jak “Khin chơ̆t phi să nàng Dà lơgar in kis”.

Tus bal tam lơh bơh tŭ gam là dùl nă oh klau dềt, cau ling yau ồng Phạm Đình Luận, lài do cau ling jak Trung đoàn Càr lơgar dê, kah wơl:

“Tŭ hơ̆ den añ ơm tàm gùng Hàng Bông. Tây là khai bơcrì bơcrà ngan lơh gơlik uă ngan tìs iơh. Tŭ jơh gùt lơgar tam lơh mờ cau sò tơm jăt jơnau hòi jà bơh Wa Hồ dê, jơh ală làng bol bal mờ cau ling, cau kra cau kơnòm cau ùr cau klau ndrờm lòt tam lơh tàm Hà Nội…Tŭ hơ̆, añ pa 9 sơnam gời, mờ tàm Trung đoàn Càr lơgar ờ di là dùl nă añ là kơnòm ờ, mờ gam uă ngan cau yal tơnggĭt tàm ală mpồl lơh broă ndai tai”.

Tàm broă lơh tìp măt lơh kwèng, jơnau tơnggĭt sền gŏ ngan geh pờ bal mờ ală jơnau yal mùl màl bơh ală cau lơh cơng sền gŏ, ală kwang bàng, cau ling Anih đơng lam broă đơng lam ling klàng kâp dờng Càr lơgar neh lơh kis wơl ală dơ̆ tam lơh rơcăng gàr kơlwàng trồ hìt dờng ồs tềng hơđăng kơltrồ càr lơgar Hà Nội tàm 12 ngai mang lơh gơs “Dơ̆ tam lơh dờng Điện Biên Phủ hơđăng kơl wàng trồ” nam 1972. Pơn jăt hơ̆ là rùp hin ală cơnđoà jơng lòt lài tàm rài ring lơngai bơh ală cau ling dê tàm rơcăng drơng wơl mờ trồ tiah lơh aniai, dong cau, dong phan bơna gơtìp rềs àr, sền gàr bơta ring lơngai ai tơl nơm gùng, tơl nơm ƀòn in. Bơh hơ̆ neh lơh gơrề uă bơta pơniờ să, lơh geh wơl bơta kơ̆p kờñ ngan tă pơgồp dà kơlhề bơh rơnàng ngai do dê pơn jăt tai lơh jăt bơhiàn “Khin chơ̆t phi să nàng Dà lơgar tờm in kis”, cih tai jơnau đơs crih jờng rơ bơta khin cha jak chài bơh broă lơh mùl màl, tơrgùm tê bal sền gàr ring lơngai, bơ̆t bơtàu Càr lơgar Hà Nội kòn bơnus niam chài, jak chài, pa ngan.

Tus bal broă lơh tìp măt lơh kwèng, klau pơnu Nguyễn Viết Thịnh, ơm tàm sơnah ƀòn Ô Chợ Dừa, yal:

“Rơnàng sền gàr is nam yau neh ngui ntìng mhàm he dê nàng gàr tơl nơm gùng, tơl nơm hìu. Bè hơ̆ den tàng rơnàng kơnòm să bol oh ngai do jơh nùs lơh ngan ngui pràn pơnu să, nùs khin cha mờ bồ tơngoh jak he dê nàng prăp gàr mờ sền gàr Càr lơgar Hà Nội ngai sơlơ pas pràn, jak chài mờ ring lơngai”.