Tơnơ̆ Dơ̆ wă ngan ngồn, ồng Lê Minh Hưng -Thủ tướng Chính phủ mờ ồng Saleumxay Kommasith - Thủ tướng lơgar Lào cribơyai kấp dờng. Bàr Thủ tướng yal bal mờ gơ̆p bè bơta tơl lơgar, gùng dà broă lơh, jơnau kờñ bơtàu tơnguh tàm tơngai tus mờ ală tờm ngan lam lơh Jơnau lơh nền tàm pơrjum bơh Pơrjum dờng Đảng bơh tơl lơgar dê. Bàr Thủ tướng tơngŏ bơta chờ hờp tềng đăp ală bơta bơtàu tơnguh niam ngan mờ tơl làm bơh gĭt gơ̆p đah 2 gah dê tàm tơngai pa do; pơn jat tai sền gĭt bơta gĭt gơ̆p is ồn Việt Nam mờ Lào là ai lơh lài ngan rlau jơh tàm broă lơh lơh broă mờ lơgar ndai bơh tơl lơgar dê. Bè lơh sa, 2 gah jờng rơ uă ngan lơh broă bal bơcri priă pơn jat tai là bơta niam tàm bơta gĭt gơ̆p đah 2 gah dê. Việt Nam tŭ do geh pơgăp 300 rơndăp broă lơh bơcri priă lơh tàm lơgar Lào mờ kờp jơh priă dan lơh 7 tơmàn dolar Mỹ. Bàr gah ring bal pơn jat tai lơh ngan tam gơl pràn, tơnguh uă bơta tàm dong kờl bal mờ tàm tơrbŏ bal đah 2 rài lơh sa dê; pơgồp bal bơt bơtàu broă lơh mờ ală phan lơh ai lơh lài ngan ngồn nàng kờñ ai priă lơh geh bơh kă bro phan đah 2 gah lơh geh 5 tơmàn dolar Mỹ. Di dơ̆ do, ồng Lê Minh Hưng- Thủ tướng Chính phủ yal Việt Nam rơ̆p lơh pà làng bol Lào in 2 nơm hìu bơsram, mờ kờp jơh priă lơh 2 tơlak dolar Mỹ.

Tơnơ̆ dơ̆ cribơyai kấp dờng, 2 Thủ tướng neh sền Dơ̆ jàu 11 sră nggal lơh broă bal tàm ală gah sền gàr lơngăp lơngai, sền gàr adat boh lam, priă jền, năng lượng, bơto bơtê  mờ bơsram, jơi bơtiàn, gah pin dờn jat Yàng mờ lơh broă bal đah ală tiah bơh 2 lơgar dê; tus bal Dơ̆ sơnđờm mut lơh rơndăp broă lơh Hìu bơsram Đại họk Lơh bơyô bal Lào mờ Việt Nam.