Dùl ngai lơh broă bi Phan Thị Lý dê, cau lơh broă mờng chài Cơldŭ Lơh sa sàh Quảng Phú, càr Dăk Lăk sùm jŏ jòng bơh àng drim gờñ tus trồ mang jơla. Broă dùl nă cau mờng chài drơng kơnòl kế toán, bơcri priă dà lơgar, tơrgờm kờp, yal wơl lơh sa - mpồl bơtiàn, bơt bơtàu ală tơngume bè jơnau kờp dŭ gơguh tai dê…bi Lý gơtùi pơn đơl lơh gơs tàm tŭ jơ lơh broă tàm ngai. Mơya mờ bơta mùl màl ờ tơl kwang bàng, bi pal dong kờl gah broă lơh sa suơn sre, kờp sền hìu bơnhă rƀah mờ bơsong ală broă bè ù tiah tàm kâp hơ đơm. Bè hơ̆ den tàng, uă tŭ pal tus rlau 7 jơ mang hơ̆ sồng bi gơtùi rê tàm hìu:

“Đah cơldŭ añ dê cau lơi kung gŏ gơ lơh kơn jơ̆ lơm, dùl nă añ tŭ do dờp kơnòl 5, 6 bơta broă, gam lơh broă do den pal lơh broă ne, gơ bè hơ̆ sùm tơn. Kung ờ kờp ngai mang, ngai lồi poh halà ngai rlô, đơs bal là pal lơh jơh broă den hơ̆ sồng ơm, halà tŭ glar ir den ơm rlô. Bè ngai òr añ pal lơh tus rlau 12 jơ mang”.

Bơta bòl glar, kơn jơ̆ ir broă tàm kâp hơ đơm ờ mìng gơlik geh mờ gah lơh sa halà ù tiah, mờ gơ rah rài tàm jơh ală gah sră pơ àr gơnoar atbồ - mpồl bơtiàn. Mò Hà Tường Vi, Lam bồ Cơldŭ lơh broă Anih duh broă Làng bol sàh Ea Súp, càr Dăk Lăk pà git, kâp sàh pa lam lơh tơn uă kơnòl broă kâp kơnhoàl dê, ờ mìng dờp, bơsong sră nggal làng bol dê, mờ gam drơng kơnòl tàm ală gah bè rơcang lài kơryan sa kuề sa kuà, broă ờ niam; lơh jat jơnau pơn dut lùp sền, broă lơh bơdìh kơnòl… Tàm hơ̆ geh ală tơngume pa, kwang bàng kâp sàh ờ hềt geh mờng chài tă pơgồp jơnau đơs mờ lam lơh:

“Dùl ngai dờp bơh 70 tus 100 sră nggal, mờ khà sră nggal pơyua kung uă sơl, khà dơ̆ pơrjum tàm poh lơh broă mờ ală sờh, gah broă lơh, anih cah rơña lơh broă bơh 3 tus 5 dơ̆ pơrjum dùl ngai, tàm tŭ ală sră pơ àr gơ rềng tus sră nggal, broă rơndap lơh kung pal lơh bè kâp kơnhoàl lài do”.

Broă ờ tơl kwang bàng geh mờng chài lơh broă gam là bơta ndrờm bal bơh jơh ală sàh, sơnah ƀòn tàm càr Dăk Lăk dê. Tỉnh ủy càr Dăk Lăk pà git, do là bơta mùl màl kờñ pal sền loh mờ geh broă lơh dipal hơ̆ sồng gơtùi dong broă lơh gơnoar atbồ ƀòn lơgar 2 kâp lơh broă geh cồng nha bè bơta kơp kờñ. Broă lơh tềng đap mat rơp là sồr, tàm ntrờn cau lơh broă bơh kâp càr, mờ kung sền swì pồ tơl wơl mpồl kwang bàng kâp sàh nàng gàr niam pràn jak lơh broă.