Jăt hơ̆, rơndăp broă lơh pờ ơnàng bơnàng gùng gơguh tus 24,75 thơk, bơ̆t bơtàu sir gơs 4 bơnàng gùng rơndeh lòt mhar, geh bơnàng gùng ơm mhar sùm, pràn rơndăp lơh lòt mhar 100 kơi sồ tàm dùl jiơ. Broă tam gơl wơl nàng kờñ bơcri priă ndrờm bal, tơngguh uă pràn jak jòi lơh mờ geh cồng nha ngui jŏ jòng bơh gơl gùng dê. Rơndăp broă lơh geh bơta jòng kờp jơh mờr 74 kơi sồ, anih sơnrờp tàm sơnah ƀòn 1 – Bảo Lộc, tàm tơrbŏ mờ gùng rơndeh lòt mhar Tân Phú – Bảo Lộc; anih dŭt ndơl tàm sàh Hiệp Thạnh, tìp bal mờ gùng rơndeh lòt mhar Liang Khàng (Liên Khương) – Prenn. Bal mờ pờ ơnàng bơnàng gùng, rơndăp broă lơh bơtơl anih tìp bal Gia Hiệp mờ broă bơ̆t bơtàu ngui tàm rài kis làng bol, tơngguh jơnau tơl pràn tàm tơrbŏ gùng lòt mờ drơng jơnau kờñ lòt rê bơh làng bol dê.

Mờ ală tam gơl do, kờp jơh priă bơcri lơh rơndăp broă lơh gùng rơndeh lòt mhar Bảo Lộc – Liang Khàng gơguh tus mờr 19 rbô tơmàn đong. Tàm hơ̆, priă kes priă dà lơgar dê geh tus rlau 47%, gam wơl là priă bơh cau bơcri priă dê hòi tơrgùm. Tơngai pơrgon lơh rơndăp broă lơh kung geh tam gơl wơl sơl, digơlan ai rơndeh in tơrlòng lòt rê tàm qúy III nam 2028, lơh gơs mờ ai lòt rê tàm qúy IV nam 2028. Tŭ lơh gơs, gùng rơndeh lòt mhar Bảo Lộc – Liang Khàng rơ̆p gơgơs ală gùng lòt rơndeh lòt mhar tàm tơrbŏ bal đah tiah đah jum măt tơngai Lik mờ tiah dơng bơnơm Lâm Đồng, ai tơl bơta bơtàu tơngguh lơh sa, lòt nhơl mờ gơhòi gơ jà bơcri priă in.