Bơh sàh bồt Nhơn Châu, bi Nguyễn Văn Bảy bal mờ 100 nă làng bol lòt ngài rlau 13 hải lý mut tàm ù gờl nàng tus bal dơ̆ pơrlòng ai sră măi rơndeh khà A1. Gơwèt mờ làng bol tàm bồt, pah dơ̆ mut tàm ù gờl là dùl dơ̆ pal kơlôi rcang broă lòt rê, tiah ơm, sào sa. Tàm dơ̆ pơrlòng dơ̆ do, ală priă tă hơ̆ geh dà lơgar dong kờl, dong làng bol tơrmù ƀà dùl bơnah kal ke. Mờ bi Bảy, bơta kwơ ngan rlau jơh là ală jơnau gĭt wă bè adat lòt rê tàm gùng gơtùi ngui tơn tàm rài kis pah ngai.

“Nùs nhơm bơh sơn rờp geh bơta mprơm nùs mơya kung jơh nùs lơh ngan pơrlòng geh cồng nha. Tŭ lòt rê tàm gùng gĭt lòt di gùng, di bơnàng gùng jat jơnau sồr bơh adat boh lam dê”.

Ồng Dương Hiệp Hưng, Chủ tịch Anih duh broă Làng bol sàh Nhơn Châu pà gĭt, bơta kwơ bơh broă dê ờ mìng ơm tàm broă dong làng bol geh tai tŭ tơngai niam geh pà sră măi rơndeh lơm, mờ kwơ màng rlau là rcang bơta gĭt wă adat boh lam lòt rê tàm gùng dùl bă niam ngan.

“Làng bol pin dờn ngan tàm ală broă lơh geh kwơ bè do, kơ̆p kờñ là làng bol ndrờm pơrlòng gơ kờn mờ tơl nă làng bol là dùl nă cau mblàng yal jơnau nàng tơnguh uă bơta gĭt wă lơh jat Adat lòt rê tàm gùng ù gờl nàng bơt bơtàu sàh bồt ngai sơlơ niam jak, pa ngan mờ kờñ gơboh bal”.

Dilah tàm bồt Nhơn Châu, bơta ngài ù tiah là bơta kal ke den tàm bàr pe tiah làng bol jơi bơtiàn dồ ết nă cau bơh càr Gia Lai dê, kal ke sơnđờm bơh broă sền mờ wă jơnau pơrlòng mờ dà yoan. Geh ală làng bol ờ gĭt sền sră, ờ gĭt cih dà Yoan. Dilah ngui broă lơh pơrlòng jơnau cih bè ờs, khi kal ke ngan lơh tơl làm ală jơnau neh geh bơto pơlam, bulah kung geh jơnau kờñ mờ bơta chài măi rơndeh rơndồ.

Nàng tă bơsong bơta kơryan do, tàm bàr pe ù tiah, bơnah pơrlòng cih jơnau geh lơh jat broă lơh lùp mờ hơ. Cau lơh broă pơrlòng kung là cau jơi bơtiàn dồ ết nă cau lùp tơn jơnau lùp mờ dà kòn cau, dong cau tus bal pơrlòng in wă di mờ tơngume mờ hơ jat bơta chài bơh he dê. Bi Rơ Châm Di, ơm tàm ƀòn O, sàh Ia O, càr Gia Lai, chờ hờp pà gĭt:

“Tŭ do geh pơrlòng sră măi rơndeh mờ gơ kờn bơnah pơrlòng jơnau cih den să tờm añ chờ hờp ngan. Tơnơ̆ do măi rơndeh rơp lơngăp lơngai rlau”.

Bơta chờ hờp bơh bi Di dê kung là bơta kơ̆p kờñ bơh uă làng bol tiah làng bol jơi bơtiàn dồ ết nă cau: geh bơsram mờ geh dờp mờ bơta chài bơh he dê, mờ jat dùl bă di pal jat mờ ală bơta geh ngan. Trung tá Thái Hoàng Nam, Lam bồ Kwang àng sàh tiah nhàr lơgar Ia O, càr Gia Lai, pà gĭt, là ù tiah geh mờr 70% khà kờp làng bol jơi bơtiàn dô ết nă cau, rài kis gam uă kal ke. Broă bơto bơtê, pơrlòng nàng pà sră măi rơndeh ờ sa priă dong làng bol geh tai ală bơta gĭt mờ adat boh lam lòt rê tàm gùng.

 “Bơh do kung tơnguh geh bơta gĭt wă bè adat boh lam lòt rê tàm gùng. Mờ tŭ geh pà ală sră măi rơndeh den làng bol rơ̆p geh nùs nhơm geh kơnòl rlau tàm broă lơh jat adat boh lam, sền gàr să tờm he dê, hìu bơnhă mờ mpồl bơtiàn”.

Bơh nggùl nhai 8/2025 tus tŭ do, Kwang àng càr Gia Lai neh pờ 13 dơ̆ pơrlòng sră măi rơndeh khà A1 ờ sa priă ai 862 nă cau gơwèt hìu bơnhă rƀah, hìu bơnhă pa lik klàs rƀah tàm ală sàh kal ke uă ngan in. Tàm khà do, 475 nă cau lơh geh jơnau sồr mờ geh pà sră măi rơndeh.

Thượng tá Ksor H’Bơ Khắp, Phó Kwang lam bồ Kwang àng càr Gia Lai pà gĭt, broă lơh dong uă hìu bơnhă kal ke geh tŭ tơngai niam gĭt mờ jơnau gĭt wă adat boh lam mờ ală bơta kờñ pal geh nàng lòt rê tàm gùng lơngăp lơngai.

  “Sồr Kwang àng ală sàh tàm gùt càr kờp sền jơh ală hìu bơnhă kal ke, hìu bơnhă dờp bơta dong kờl mpồl bơtiàn kờñ geh Dà lơgar dong kờl. Tơnơ̆ hơ̆ cih mat mờ lơh jat ală broă lơh nàng dong làng bol tàm ală tiah do in lơh geh broă pơrlòng nàng geh sră măi rơndeh, gàr niam broă gĭt wă adat boh lam tŭ lòt rê tàm gùng”.

 Gơwèt mờ ală ù tiah gam uă kal ke tàm Gia Lai, broă lơh “Sră măi rơndeh kờñ gơboh” kung là broă ai ală bơta gàr niam lơngăp lơngai lòt rê tàm gùng tus rềp rlau tai mờ làng bol, bơh hơ̆ pơgồp bơnah bơt bơtàu nùs nhơm lơh jat adat boh lam lòt rê tàm gùng bơh tàm kấp hơđơm dê.