Nar 7/4, ntŭk kan ntĭm n’hanh nti n’gor Điện Biên lĕ geh ƀư rơh njroh mprơ, nău njroh ta trong nkuăl ƀon têh bâh kon hoc, sinh viên.Aơ lah nău pah kan na nê̆ vơt rhơn kahgĭt 70 năm nău dơi Điện Biên Phủ.

Bôk nău kan geh ƀư tâm ndrĭh ndrel ta 4 ntŭk: quảng trường 7/5, quảng trường nkuăl ƀon têh Điện Biên Phủ, tach ƀư lễ n’hanh ntŭk ndah rup kahgĭt nău dơi Điện Biên Phủ. Ntŭk kan ntĭm n’hanh nti n’gor Điện Biên lĕ rgum geh rlău 11 ntŭk kan, đah rlău 2.200 kon hoc, sinh viên tât râng njroh mprơ rlău 33 nkô̆ nău,đah ăp nău njroh xòe, nău mprơ mpơl ntĭt nău ueh êng bâh ăp mpôl rnoi kơt: Thái, Mông, Lào...ndrel đah ăp nău njroh ueh êng, ngăch dăng. Ăp nkô̆ nău njroh mprơ geh ƀư tĭng trong sŏng dang, tâm pleh. Bôk nău kan gay ma mât rbăy n’hanh hun hao nău njroh mprơ n’hanh ăp nău njroh ta trong nkuăl ƀon têh tâm kon hoc, sinh viên, mât nău ueh văn hóa way ơm n’gor Điện Biên. Ngăn lah trĕ lam nău ueh rup ueh Điện Biên tât đah băl mpôl dăch ngai, ntrôl an hun hao pâl nđaih ta ntŭk.