- Ntŭk bah nău mĭn ma H’Juel n’hanh rnăk wâl ƀư Công ty Leng Gung way mpla nsơ, nkoch tơih n’hanh tăch ăp ndơ bah văn hóa way ơm nuĭh Bunong n’gor Dak Nông ?

H Juel ơh: Tă aơ 10 năm, rnôk gâp mhe sŏk sai, gâp saơ kônh wa hôm e mât âk nău way ơm, lơn lah ăp nău ƀư brah, ma tâm ăp nău ƀư brah ri mô dơi mô geh ndrănh yăng. Bah nĕ gâp nti mê̆ sai ntĭm n’gôn ndrănh yăng n’hanh ƀư ndruo bri, mhe bôk năp n’gôn 1,2 yăng gay rnăk wâl ngêt mô lah dŏng tâm nău ƀư brah jêt bah rnăk wâl, mbrơi mbrơi n’gôn âk lơn mô knŭng rhŏ an tâm nău ƀư brah bah ƀon lan ma hôm ŭch nkoch tơih mpla nsơ ndơ ndrănh yăng n’gôn tĭng trong way ƀư bah nuĭh Bunong tât đah năch ăp ntŭk n’hanh aƀaơ ndrănh yăng bah gâp lĕ dơi gĭt đah âk nuĭh. Rlău ma nĕ gâp hôm dŭt ŭch tât mbân ao bah rnoi nơm, ăp cheh ndrang ta kho ao geh du nău nkoch, du nău khlay êng tâm nău rêh ăp nar, ăp rup gui kơt grăp nông, grăp rpoăl, yêh, sĭm, rup nuĭh... dŭt uĕh. Ndrĭ jêng gâp lĕ geh nău mĭn nkoch, mpla nsơ tât ăp nuĭh wât tay mpeh nău uĕh văn hóa nĕ bah rnoi nuĭh nơm, bah Công ty TNHH Leng Gung bah gâp dơi ndâk njêng tâm năm 2022.

- Tăch rgâl ăp ndơ mpeh văn hóa geh moh ndơ êng đah ăp ndơ êng n’hanh tâm nĕ ri he an uănh khlay moh ndơ?

 H Juel ơh: Tăch ăp ndơ way ơm bah rnoi nuĭh đêt kơt ndrănh yăng, kho ao tanh, ăp ndơ tanh, ndơ tâm an ƀư bah cheh tanh brai, ngâr reh... geh âk nău êng n’hanh jêr jŏt lơn nkôp tăch ăp ndơ êng, yor ăp ndơ aơ dŭt jêr nuĭh, yor rĭ gay wăch rgum năch mpôl hên tĭng ngăch ntŭk tăch, ƀư âk ndơ way dŏng bah brai tanh kơt ƀap, dŭng cheng, nkep sŏk, ntô jôt, ăp ndơ tâm an nkah ndrăy gay dơi gĭt nău ŭch bah năch n’hanh gay ndơ̆ ndơ uĕh way ơm bah nuĭh rnoi đêt nơm dơi âk nuĭt gĭt tât.

- Ăp ndơ cheh tanh way ơm, ngâr reh mô lah ndrănh yăng... bah H Juel pă an geh năch ŭch đŏng, ntŭk tăch aƀaơ m’hâm, nău tăch geh jêr jŏt đŏng?

H Juel ơh: Ndrănh yăng kơt ăp ndơ tanh, kho ao bah Công ty mpôl hên aƀaơ lĕ geh dŭt âk nuĭh gĭt tât n’hanh nchăm rwăt... mô knŭng tâm di nău ŭch bah năch tâm n’gor Dak Nông ma hôm dơi âk năch ta nkual ƀon têh Hồ Chí Minh, Hà Nội nchăm rwăt tay, aƀaơ nău kan tăch ndơ aơ dŭt dơh.

- Dơi lah nău kan tăch rgâl bah rnăk wâl H Juel dôl rgâl ntŭk tăch ăp ndơ bah văn hóa way ơm. Nău tăch aơ mbra dôl rgop nta nău kan, n’hao nău geh an kônh wa ta ƀon lan đŏng?

H Juel ơh: Gâp dŭt răm yor ăp ndơ way ơm bah rnoi mpôl nơm dơi âk nuĭh gĭt tât, n’hanh kơl ăp nghệ nhân tanh reh ngâr, tanh brai, nău kan n’gôn ndrănh yăng geh tay prăk tâm nău rêh, ndơ̆ nău kan way ơm rnoi nơm rêh tay tâm nău rêh mhe gay âk nuĭh gĭt tât nău uĕh Bunong Preh, Prâng, Nong tât đah âk nbuĭh lơn.

- Săk H Juel nơm nkre ƀư phóng viên, răk rblang nău ngơi, nkre n’hanh rnăk wâl mât uănh công ty, 2 nău kan geh nău tâm ntop kơl ndrel đŏng?

H Juel ơh: Đah nău kan khlay lah phóng viên, răk rblang nău ngơi Bunong n’hanh nkre mât uănh Công ty TNHH Leng Gung ri dŭt dơh... rnôk ntuh rup gâp nsoh mbân ao way ơm bah Cty Leng Gunmg nkra njêng nkre mpla nsơ ndơ n’hanh nkre nkoch trêng mât ndrăy văn hóa rnoi mpôl nơm dâl. N’hanh bah nău kan phóng viên, răk rblàng nău ngơi ma ndrănh yăng bah gâp tăch geh dŭt âk nuĭh nchăm n’hanh âk nuĭh gĭt tât nchrăm dŭt âk. Gâp saơ aơ lah du nău dŭt lap n’hanh dơh đah gâp.

- Tât tâm năm mhe, H Juel geh nău nchrăp, trong nchrăp đŏng an nău kan nơm, lơn lah nău mât ndrăy, ƀư uĕh ăp nău khlay văn hóa way ơm? geh nău mbơh H Juel ŭch njuăl tât ăp băl mom, njuăl tât kônh wa đŏng?

H Juel ơh: tâm năm mhe gâp ŭch lôch jêh 1 mlâm jay nhih way ơm bah nuĭh Bunong gay geh ntŭk mpla nsơ, mât ndrăy văn hóa ăp ndơ way ơm bah nuĭh rnoi đêt. Rlău ma nĕ geh naư nchrăp tam rgop đah ăp công ty pâl nđaih ta ntŭk n’hanh bah dih n’gor gay mpla nsơ tay ndơ bah Bunong Preh, Prâng, Nong... ta n’gor Dak Nông. Gâp ŭch ăp rơh druh ndăm Bunong nsrôih mât ndrăy nău uĕh văn hóa way ơm bah nơm, mô dơi an roh rui. Nkhêp di năm mhe gâp dăn njuăl mbah rhơn tât lĕ rngôch kônh wa dăch ngai geh du năm mhe uĕh lăng, năm mhe ngăch dăng n’hanh lôch geh lơn tay.

Dăn lah uĕh H Juel, mbah rhơn oh n’hanh rnăk wâl du năm mhe uĕh lăng, đăp mpăn, nău kan lôch geh!