Ta nkual ƀon têh Đà Lạt, n’gor Lâm Đồng mhe ƀư lễ nkah ndray 130 năm Đà Lạt têh jêng n’hanh hun hao, wơt dơn săk ntơ lư nkual ƀon têh blău rlă mhe mpeh âm nhạc bah UNESCO. Tât râng geh wa Phan Đình Trạc - Ủy viên Bộ Chính trị, Bí thư Trung ương Đảng, Kruanh Ban Nội chính Trung ương, wa Lê Minh Khái - Bí thư Trung ương Đảng, Groi thủ tướng Chính phủ, ntơh măt ăp n’gâng kan, Trung ương, kruanh rđău kan, kruanh rđău kan ơm Đảng, Ngih dak, Me Việt Nam dăng janh, ăp mpôl năch dak bah dih, ndrel âk mpưm nuĭh ƀon lan n’hanh năch dak bah dih.

Ta dor yôk Langbiang têh hvi đah rnoh prêh 1.500m rđĭl đah măt dak lêng, Đà Lạt dơi trôk nar ntăm an n’hâm sial nđik uĕh wăr năm, bri dak uĕh măt uănh, jêng ntŭk tât đăp mpăn, wăch rgum uĕh năch dak pâl nđaih tâm dak n’hanh dak bah dih. Lah nkual neh gŭ rêh jŏ bah ơm nuĭh K'Ho, tâm ăp năm kêng dŭt rach năm 19, nuĭh Pháp hŏ tât nkual neh dja rdâk njêng nkual ƀon têh rlu rlău, lôch nê wăch rgum âk nuĭh ƀon lan tât gŭ rêh rlău âk rơh kơn. Nău tâm rlai bah ăp văn hóa hŏ njêng rup uĕh êng, mha êng tâm trong gŭ rêh bah nuĭh Đà Lạt aƀaơ.

Rlău 130 năm têh jêng n’hanh hun hao, muh măt nkual ƀon têh Đà Lạt, n’gor Lâm Đồng hŏ geh nău rgâl đăt ndal, wăng sa-rêh jêng kon nuĭh hun hao, njrăng n’gang neh dak- rnă njrăng đăp mpăn, tâm boh dak bah dih dơi pơk hvi. Rlău ma săk geh mpeh hun hao tuch tăm công nghệ mhe, pâl nđaih hŏ jêng n’gâng kan wăng sa khlay. Dŭt njrăng, Đà Lạt hŏ ntik dơi săk tơm văn hóa rnoi nuĭh, nkre đah trong gŭ rêh nuĭh Đà Lạt “Mbleh mblôn- n’gơch n’hơu- dêh rmên năch”.

Wa Đặng Quang Tú, Kruanh UBND nkual ƀon têh Đà Lạt lah rjăp, ăp nău dơi dŭt di ma nău n’hao săk bah nkual ƀon têh, nê lah hŏ jêng nkual ƀon têh rgum tơm pâl nđaih ntoh lư tâm dak n’hanh dak bah dih, nkual ƀon têh Festival kao bah Việt Nam, Nkual ƀon têh ăp tŏng nău lư, nkual ƀon têh blău rklă mhe Âm nhạc bah UNESCO, n’hanh aƀaơ dôl nsrôih rdâk njêng lah nkual ƀon têh drăp ndơ ơm yău ntlơi an tay lam ntŭr neh. Mô dơn nê, Đà Lạt hôm dơi 2 tơ̆ kơp dơn lah “Nkual ƀon têh pâl nđaih kloh uĕh ASEAN” n’hanh  lah ngoăy tâm ăp ntŭk tât dŭt rngân uĕh châu Á. Wa Đặng Quang Tú, lah rjăp:

“Năm 2014, Thủ tướng Chính phủ n’gluh nău n’glêh an 704, tâm ban kơt Nghị quyết mbrô 04 bah Tỉnh ủy Lâm Đồng hŏ ntrŏng rnoh tât: Rdâk njêng Đà Lạt jêng nkual ƀon têh uĕh mhe, nkual ƀon têh blău mhe, lah ntŭk rgum pâl nđaih bri dak, rlu rlău gưl têh, pâl nđaih văn hóa drăp ndơ ơm yău ntlơi an tay têh lam ntŭr neh săk ntơr, lah ntŭk rgum văn hóa, nghệ thuật, thể dục, thể thao n’hanh uĕh mƀak gưl nkual; du ntŭk tât ntoh lư an nău rklă mhe n’hanh nchreng an uănh nău njroh mprơ. Bah năp ăp trong tât mhe, Đảng bộ, n’gâng kan n’hanh ƀon lan nkual ƀon têh Đà Lạt tâm rnglăp êng du nuih n’hâm, nsrôih rgâl mhe, dơn kan âk gay ƀư jêng ngăn ngăn nău nđơr geh hun hao, nkah gĭt n’hâm suan têh kuâng bah ăp rơh kơn u che, hŏ geh n’hâm suan pah neh, rdâk njêng n’hanh hun hao nkual ƀon têh dja”.

Lah ta rơh lễ nkah ndray 130 năm Đà Lạt têh jêng n’hanh hun hao, Groi Thủ tướng Chính phủ Lê Minh Khái hŏ nchih nkah n’hanh rnê âk ăp nău dơi ntoh lư ma Đảng bộ, n’gâng kan, tahen n’hanh ƀon lan ăp rnoi nuĭh nkual ƀon têh Đà Lạt lah êng, n’gor Lâm Đồng lah nsum hŏ dơi geh tâm du njăr trong rlău aơ, rgop khlay tâm nău dơi nsum bah lam dak.

Đah nău nđơr geh n’hanh nău nsing nơm mpeh du nkual ƀon têh Đà Lạt mât ndray rup uĕh lhêt lhơt, way ơm yơn way rgâl mhe, blău rklă mhe, hun hao nar lơn ma rsang rnglăy, têh uĕh mhe, săk ntơr tâm let năp tay, Groi Thủ tướng dăn đă Đảng bộ, n’gâng kan, ƀon lan nkual ƀon têh Đà Lạt ân ntrŭt ntrôl dăng lơn hun hao wăng sa- rêh jêng kon nuĭh đah trong rƀŏng sŏk nuĭh ƀon lan ƀư rgum tơm; nuĭh ƀon lan nkre lah rnoh tât kan, nkre lah nuĭh tơm kan, nkre lah suan ntrôl, nkre lah nuĭh dơi geh dŏng bah ăp nău dơi hun hao. Groi Thủ tướng lah rjăp:

“Gâp dăn đă Đảng bộ, n’gâng kan, ƀon lan nkual ƀon têh Đà Lạt mât ndray, bun dăp tay nău tâm rnglăp lam rnoi nuĭh; mô rlu n’hao nău dơi rđău kan n’hanh suan rlăch ndăng bah mpôl kan Đảng, đảng viên; rdâk tay nău tâm rnglăp, dơn ngoăy tâm Đảng bộ n’hanh lam trong kan chính trị, njêng nău tâm ban ŭch bah ăp rơh kơn ƀon lan. Âk ntil  trong ƀư, rgum ntêr lĕ, nsĭt geh nău tam ăp tơm ndơ lam rêh jêng kon nuĭh n’hanh lĕ n’hâm suan lơn đŏng tâm ntuh kơl hun hao buăt nthoi ndơ dŏng ăp kôp, tâm di, geh nău tam, lơn lah ăp trong nchrăp ndơ dŏng jong khlay, ndơ dŏng văn hóa, ntĭm nti, dak si, ndơ dŏng rgâl mbrô, rdâk njêng nkual ƀon têh ăp tŏng nău lư, rgop Đà Lạt jêng du ntŭk hun hao khlay bah nkual, bah neh dak, bôk nthoi khlay đah nkual n’hanh lam ntŭr neh”.

Groi thủ tướng njrăng đă đŏng, Đà Lạt ân ntik hvi tay săk ntơ nkual ƀon têh Festival kao Việt Nam; ndăn dŏng ăp ndơ săk geh n’hanh dơh uĕh, ntuh kơl hun hao pâl nđaih têh khlay; hun hao tuch tăm công nghệ mhe tĭng trong nđĭr, kloh uĕh nâp dăng; dâk kan nsrôih uĕh n’hanh ntik n’hao nău khlay kan nsum tâm ăp nkual ƀon têh blău rklă mhe bah UNESCO, bah nê rgop ntrŭt ntrôl n’hao rnoh khlay rgop âk tâm n’gâng kan công nghiệp văn hóa tâm jâng wăng sa n’gor./.