Nkhêp geh bôk năm mhe, ta ăp nkuâl ta n’gor Dak  Lak hŏ ƀư âk nău kan văn hóa, lễ hội bah ăp rnoi mpôl đê̆, njêng păng rup săk ntơr âk ntil văn hóa ta nkual neh nklang Tây Nguyên.

Ntơm bôk an ăp nău kan văn hóa khay năm mhe Giáp Thìn 2024 lah nău way Lễ wơt Quốc mẫu Âu Cơ ta Nkual pâl nđaih bri dak, văn hóa, nsum mpôl Ko Tam, nkual ƀon têh Buôn Ma Thuột, n’gor Dak Lak. Tâm mông nar huêng khlay, dơi ƀư têh uĕh, mpơl  nuih n’hâm nkah gĭt Quốc Mẫu, đah ăp ndơ ƀư kơt  bánh phe, kŭl mƀêt, chè njŭng  n’hanh âk ndơ kah khlay ntĭt êng bah n’gor. Nuĭh ƀon lan n’hanh năch pâl nđaih hăn uănh pâl n’hanh njuăl nău wơl geh ta nău mpŏng ŭch. Hăn ndrel rnăk wâl tât râng lễ, wa  Nguyễn Thị Thoạt, 70 năm deh, ta  phường Tân Lợi, nkual ƀon têh Buôn Ma Thuột nkoch:

“Lor bôk năp gâp hăn ta aơ râng wơt quốc mẫu Âu Cơ. Lah nău nkah klâng ngăn, nkah kon său ân nkah tât tu tơm bah kon nuĭh n’hanh nkah  mpeh nuih n’hâm uĕh lŏng bah kon său đah Quốc Mẫu, kơl  kon său gĭt lah he ân mât ndray dơi lịch sử bah kon nuĭh Việt Nam bah he, way nkah mpeh tu tơm, ân nkah mpeh u che yău ye, rƀŏng sĭt tu tơm bah he”.

Ntơm bah năm 2019 tât aƀaơ, ta aơ way ƀư nău way mpoh nhang, nkah gĭt Quốc Mẫu tâm nar 25 khay jât ma bar n’hanh lễ wơt Quốc Mẫu tâm nar mùng 7 khay ngoăy ăp năm. Wa Nguyễn Thị Ngọc Anh, Giám đốc công ty an gĭt, nău way lễ wơt Quốc Mẫu Âu Cơ jêng du rup uĕh văn hóa, njêng nău tâm rnglăp,  krêp dêh bah ƀon lan ăp  rnoi mpôl, nar lơn ma dơi âk mpưm nuĭh ƀon lan gĭt tât n’hanh râng.

          “Chon mbah quốc mẫu Âu Cơ nkoch tât nău way ơm Quốc mẫu Âu Cơ leo 50 kon hao yôk, nkre đah nău way tĭng ur bah nuĭh rnoi mpôl đê̆ ta Tây Nguyên, kơt nuĭh Rđe ta Dak  Lak aƀaơ nha hôm nău way tĭng ur đŏng. Nkre ŭch rŏng ăp nuĭh bah nău nkoch “du me deh rhiăng tăp, rhiăng kon” dja mbra ndrel tâm rnglăp gay rdâk njêng neh dak, ƀon tơm, tâm kơl  nsum gay ndrel gŭ rêh, ndrel tâm pêt tâm mât tâm nkrum nsum”.

Ăp nău kan văn hóa, lễ hội khay năm mhe hôm dơi ƀư ta ăp nkuâl, thị xã tâm n’gor Dak Lak đŏng. Ntoh lư kơt: Nar hội văn hóa, thể thao rnoi Mông ta nkuâl Krông Bông, Lễ hội Hảng Pồ ta thị xã Buôn Hồ, Lễ hội văn hóa way ơm Việt Bắc ta nkuâl Krông Năng; tâm rlong tâm nhăt Vụ Bổn,… Ta nkuâl Krông Ana geh 2  nău kan têh lah tâm rlong duk bu klô way ơm pơk hvi n’hanh nău way njŭr  tơm njuh bah nuĭh Mường. wa Hoàng Minh Giám, Groi kruanh Rnâng kan UBND nkuâl Krông Ana an gĭt:

“Aơ lah du rup uĕh bah ăp rnoi nuĭh nkuâl Krông Ana gay dăn an ăp brah yang jăt tĭng kơl an neh dak uĕh lăng ƀon lan đăp mpăn, ndơ tuch tăm jŭr geh uĕh jêng. Nkhêp geh rnôk kơt aơ đŏng gay kuăl jă n’hanh nkoch n’hơ rup gui nkuâl Krông Ana uĕh reh, ăp năm ƀư du rêng pâl nđaih way rgum năch pâl tât đah Krông Ana”.

          Ta xã Cư Prông, UBND nkuâl Ea Kar, ƀư Nar hội Văn hóa ăp rnoi mpôl đê̆ nkuâl  tâl III đah ăp nău kan kơt: nchreng an uănh văn nghệ way ơm ăp rnoi  nuĭh; tâm rlong Ăp nău pâl rlưn way ơm; pla n’hơ n’hanh rlong sa ăp ndơ sa ăp nkual; rlong uănh pâl ăp ntŭk  gŭ rêh văn hoá Tây Bắc, Tây nguyên n’hanh văn hóa lăp rgum; hăn uănh pâl ntŭk têl ơm yău bri dak uĕh măt uănh leng Drai Y Bar; tâm rlong duk kruh n’hanh duk Ka Yak; pla n’hơ n’hanh tăch ăp ndơ geh ƀư ntĭt êng, ndơ geh ƀư OCOP.

Đah 28 rnoi nuĭh ndrel gŭ rêh, njêng nău ta ta 220 thôn, buôn, tổ dân phố tâm lam nkuâl hŏ njêng ntŭk rgum tơm uĕh mƀak khuh n’gôr đah âk săk ntơr văn hóa dơi mpơl ta nar rgum pâl. Ndrel đah nău nteh chĭng gong bah nuĭh Rđe, nău nteh đàn tính mprơ then bah nuĭh Tày-Nùng, nău mprơ quan họ Bắc Ninh lah ăp nău pâl rlưn way ơm geh nău ntĭt êng bah ăp rnoi mpôl đê̆ kơt ntŭp bler, tâm gĕ be, nchah yŭng yai, put măt hăn tĭng nhŭp  joi…

          Tĭng wa Lại Đức Đại, Groi giám đốc Sở Văn hoá – Thể thao n’hanh Pâl nđaih Dak  Lak, ăp nău kan, văn hóa lễ hội ta n’gor ƀư tâm du bông khay ngoăy. Ăp nău way ôp brah, lễ hội geh nkô̆ rhơn mƀak,  ndjôt săk ntơr bah ăp rnoi mpôl đê̆, mpơl  nău âk mpưm tâm săk tơm văn hóa bah 49 rnoi nuĭh dôl gŭ rêh ta n’gor. Aơ mô dơn lah ăp nău kan rgop ntrŭt ntrôl  pâl nđaih, ma hôm njêng luh ntŭk pâl rlưn kloh uĕh, nsĭt tay nău rhơn nđơr an ƀon lan n’hanh năch pâl nđaih tâm ăp nar năm mhe.

“Ăp nău kan mpeh văn hóa, njroh mprơ, thể thao geh tât nău mât ndray ăp săk tơm văn hóa rnoi nuĭh dơi ƀư khuh n’gôr ta ăp nkuâl n’hanh lơn lah ntơm bah nar mùng 5 tât nar 15 khay ngoăy, mbrach lam ăp nkuâl ta n’gor. Ăp nău kan ƀư di tâm ăp nar bôk năm mhe rhơn mƀak gay kônh wa ntơm du năm mhe đah âk nău rhơn nđơr n’hanh nău mpŏng”.