Trường Sa, Hoàng Sa way lah nkual neh huêng khlay,  mô dơi tăch luh  bah neh dak Việt Nam. Lah rjăp nău dja, tâm bah ri aơ nơh, ta n’gor Dak Lak hŏ geh âk trong nkoch trêng ăp rơh  kơn ƀon lan, ƀư  ma ăp rup gui n’hanh siƀŭt ơm yău lịch sử geh rnoh khlay tâm di. Bah nê rgop bun dăp nău rŏng dak lêng gôl dak, n’hao nău gĭt êng, nău dơn kan bah nuĭh ƀon lan tâm  nău mât njrăng ƀư tơm dak lêng gôl dak bah neh dak.

        Bôk năm aơ, ta Bảo tàng Dak Lak, nkual ƀon têh Buôn Ma Thuột ƀư du pla n’hơ êng nơm đah nkô̆ “Trường Sa – Ntŭk bôk trong rlong sial”. Pla  n’hơ bơi 100 păng rup ơm yău mpeh ăp nău kan tiăr nti nchrăp rdâng lơh n’hanh nău rêh nău kan bah cán bộ, tahen n’hanh ƀon lan ta ndru gôl dak Trường Sa; rup 21 gôl dak mpeh ndru gôl dak Trường Sa ndrel ăp ndơ hôm geh mât ndray kơt cờ Tổ quốc, cờ Tahen dak lêng ƀon lan Việt Nam, ndơ geh ƀư bah ntô klo klêp, ntô klo dak lêng tă bah ăp tahen ta ndru gôl dak Trường Sa ƀư êng. Tâm rnôk ƀư pla n’hơ hôm pơk an uănh 5 tập phim Phóng sự - Tài liệu mpeh Trường Sa.

        Pla n’hơ hŏ wăch rgum âk mpưm nuĭh ƀon lan n’hanh năch hăn tât uănh pâl. Wa Tôn Thất Tuấn Ninh, ta nkuâl Lăk, n’gor Dak Lak nkoch, ăp ndơ geh ƀư hŏ nkoch gĭt âk mpưm  nău lư, dêh bên, ngăn ngăn mpeh ndru gôl dak Trường Sa âk ding n’hanh bêng ler suan rêh.

          "Ta Tây Nguyên n’hanh Dak Lak, lor bôk năp gâp dơi râng du pla n’hơ nkoch saơ dơi nău rêh tâm ban kơt nău kan bah ăp tahen  ta ndru gôl dak Trường Sa, gay kônh wa ta Tây Nguyên gĭt dơi nău rêh ta ntŭk bôk trong rlong sial bah neh dak”.

Mô dơn ta nkual ƀon têh Buôn Ma Thuột, ntơm bah năm 2014 tât aƀaơ, Sở Thông tin n’hanh Truyền thông n’gor Dak Lak hŏ ƀư âk nău kan nkoch trêng mpeh pah kan   mât njrăng ƀư tơm ndru gôl  dak lêng. Tâm  nê, geh hăn pla n’hơ “Hoàng Sa, Trường Sa bah Việt Nam – Ăp ndơ an saơ kăl e n’hanh nău tâm di” ta ăp nkuâl: M’Drắk, Ea Kar, Ea Súp, Krông Bông, Ea H’leo, Cư Kuin n’hanh thị xã Buôn Hồ. Ta ăp ntŭk pla n’hơ bản đồ n’hanh ndơ  ơm yău kăl e an saơ ntŭk nsing tâm di ƀư tơm bah Việt Nam đah bar ndru gôl dak Trường Sa n’hanh Hoàng Sa ta dak lêng. Ăp ndơ ơm yău  dơi nchih nkah tâm âk tơm ndơ rgum nchih kăl e  bah Việt Nam n’hanh ăp dak, lơn lah ăp ndơ ơm yău, bản đồ dơi rgum vẽ, n’gluh dŏng rôk năm tâl 16 tât aƀaơ ta Việt Nam n’hanh ta âk dak lam ntŭr neh.

Wa Nguyễn Quốc Hiệp, Groi Giám đốc Sở Thông tin n’hanh Truyền thông n’gor  Dak Lak, Kruanh mpôl leo ƀư  pla n’hơ an gĭt: ăp ndơ ơm yău n’hanh bơi 100 bản đồ dơi pla n’hơ  lah rgum ăp ndơ  ơm yău di ngăn hŏ dơi mbơh bah ntơm tât aƀaơ tâm dak n’hanh lam ntŭr neh; năl di rnôk  njêng, dŏng ƀư n’hanh mât njrăng ƀư tơm bah Việt Nam đah 2 ndru gôl dak Hoàng Sa n’hanh Trường Sa. Lôch  ăp rơh pla  n’hơ wăch rgum  hang rbăn tơ̆  nuĭh ƀon lan tât uănh pâl, joi gĭt.

"Ma trong ƀư  pla n’hơ hŏ rgop khlay gay n’hao nău gĭt êng , nuih n’hâm dơn kan bah ăp cán bộ, đảng viên lah êng n’hanh nuĭh Việt Nam lah nsum, rgop uĕh tâm  nău mât njrăng ƀư tơm dak lêng, gôl dak n’hanh tĭng ƀư geh nău dơi 2 nău dơn kan khlay lah rdâk njêng n’hanh mât njrăng neh dak”.

Nău nkoch trêng mpeh ƀư  tơm dak lêng  gôl dak hôm dơi ăp nkuâl ta Dak Lak an ƀư n’hanh rêng lam tât nai ntĭm n’hanh kon se nti tâm ăp nhih nti. Ta thị xã Buôn Hồ, Rơh tâm rlong “Oh rŏng dak  lêng, gôl dak  Việt Nam” hŏ dơi ƀư tâm kêng dŭt năm 2023 tĭng trong ƀư jêng sân khấu an ăp nhih nti THCS. Lôch rơh tâm rlong, lĕ ma nai ntĭm n’hanh kon se nti mbra geh nău nchrăp răp jăp, joi gĭt jru lơn mpeh ƀư tơm dak lêng gôl dak, ntơm bah nê mpơl nău blău mhe tâm ăp gâl tâm  rlong mbơh rblang, ơm gĭt blău tâm săk n’hanh nău ngơi lơn nkoch trêng.

Nai ntĭm H B’hai Mlô, nhih nti THCS Trần Phú, phường Đoàn Kết, thị xã Buôn Hồ nkoch: rơh tâm rlong mô dơn njêng luh ntŭk pâl uĕh ma hôm rgop n’hao nău gĭt wât bah nai ntĭm n’hanh kon se nti mpeh dak lêng gôl dak Việt Nam, ntơm bah nê, hŭr tŏ ăp nău rŏng ƀon tơm, neh dak.

"Kon se nti tât ơm đah rnoh khlay dak lêng gôl dak, lịch sử ăp rơh kơn u che he  hŏ n’groh an nting mham tâm ăp rơh tâm lơh mât njrăng dak lêng gôl dak. Gay ăp kon se tât gĭt ơm ntơm bah nê gĭt wât, trong uănh năl di mpeh rnoh khlay dak lêng, gôl dak bah ƀon tơm he nơm. Ăp kon se nti dŭt rhơn nđơr joi gĭt n’hanh rgum joi êng ăp nău ôp, ăp nău gĭt wât mpeh dak lêng gôl dak”.

Hôm đah oh Trần Nguyễn Đăng Khoa, kon se nti jrô 11A1, Nhih nti THPT Y Jút, xã Ea Bhôk, nkuâl Cư Kuin, n’gor Dak Lak, yor nău  ŭch rŏng jêng way joi gĭt nău lư,  uănh clip mpeh dak lêng gôl dak ta internet, kơl oh gĭt êng kloh lơn mpeh nkô̆ hôr khlay bah dak  lêng gôl dak  neh dak.

"Đah gâp nơm lah kon se nti ân nsrôih kơt nti jăp uĕh lơn, nsrôih nkoch trêng tât ăp nuĭh mpeh ƀư tơm dak lêng gôl dak bah Việt Nam. Nău gâp ŭch rŏng lah mbra jêng nuĭh tahen dak lêng, yor dak lêng gôl dak lah du gâl ntô mblăy bah he, jêng nuĭh mât njrăng  păng ri lah nău dơn kan dŭt huêng khlay"./.