Tâm rnoh 29 ntil ndơ bah neh dak geh kơp dơn tĭng nau ntrŭnh bah Thủ tướng Chính phủ lơ 18/1 mhe rlau, geh du ntil ndơ khlay dôl geh mât tâm Bảo tàng n’gor Dak Lak. Nê lah “rgum loih chuh lŭ Thác Hai” đah 25 ntil ndơ, geh 200 mâng chuh ueh ndrel 50 mâng ndơ nkra kơt mâng chuh; geh Bảo tàng Dak Lak tâm rgop nsum ma Bảo tàng Lịch sử Quốc gia joi sŏk tâm Di chỉ khảo cổ học Thác Hai, tâm thôn 6, xã Ia Jlơi, nkuăl Ea Súp, n’gor Dak Lak. Di chỉ khảo cổ học Thác Hai geh saơ bôk năm 2020, geh joi rơh bôk năp tâm khay 3 khay 4 năm 2021; rơh tal 2 ntơm khay 11 năm 2021 tât khay 5/2022.

Bah nê năl geh dơi nau ueh ơm mbâl nklăp 2 mét, tâm trôm nê geh âk ntil geh mpơl saơ kơt môch tâp, ntu neh jri ndrel âk ntil ndơ kơt: Ntôl, sung, ƀôn, ndơ tôp nkhop si đah lŭ, ndơ uk, ndơ rchok, rlau 1000 mâng chuh lŭ ăp ntil ndrel âk rbăn ndơ plôk nkhop si jê̆. Tĭng ăp nŭih mĭn ƀư nau kan, nau rgum joi saơ mâng chuh lŭ Thác Hai lah nau mpơl saơ ueh mhe ngăn mpeh nau kan ê nkra mâng chuh lŭ âk ngăn ntơm bah rnôk bah kơi nau dŏng lŭ mhe tâm Tây Nguyên./.