Rƀŏng kơt “Du pơh ao dai” yor Trung ương rmôt kan bu ur Việt Nam rgŏ jă, măng 3/3 ta Công viên giọt nước, nkuăl ƀon têh Kon Tum, rmôt kan bu ur n’gor Kon Tum tâm rgop ma Sở Văn hoá, Thể thao ndrel pâl n’aih Ƀư bôk nau kan “Măng nsoh ao dai”.

Đah nkô̆ “Bu ur Kon Tum ƀư ueh tĭng nau ueh ơm ao dai”, tâm măng rgum aơ, geh 350 nŭih bu n’gor Kon Tum ndrel ƀư nau njroh mprơ, nsoh 2 blah ao dai geh nkô̆ “Kao Pơ lang” yor nŭih kchoh ao dai Ngọc Minh nkra ndrel ăp blah ao dai aơ đah nkô̆ “Ntŭk ƀư nau ueh ơm” bah nŭih ê nkra ao Kim Yến.

Lĕ 2 nŭih nkra ao dai kŏ lah nŭih ta Kon Tum, ndâk nau kan geh nau dơi jêh rnôk râng nau ntĭm nti nau kchh Ao dai yor Trung ương rmôt kan Bu ur Việt Nam tâm rgop ma ăp nŭih nkra ao dai bôk năp tâm lam dak ƀư.

Rnôk aơ, rmôt kan bu ur n’gor Kon Tum rgŏ jă nau tâm rlong Bu ur ndâk nau kan năm 2024 đah nkô̆ “Bu ur Kon Tum ndâk nau kan, ƀư ueh nau dơi bah nkuăl ndrel ntrơn rgâl ndih”. Rơh ndơn nau rlong mbrơi ngăn tâm lơ 30/6/2024. Rơh tâm rlong gay njêng nau mĭn, nau kan bah bu ur Kon Tum tâm nau mât ueh nau kan tuch tăm tâm âk nau kan, tă bah nê kơl an bu ur nau dơi văng sa, ntrŭt dăng nau tâm ban bu ur bu klô ndrel ndâk rnăk vâl ueh lăng./.