Măng 16/2, Hội Nhà báo n’gor Kon Tum ntơm pơk Hội báo Xuân Giáp Thìn năm 2024. Nău kan ƀư ta Bảo tàng n’gor Kon Tum tât lĕ nar 19/2. Hội báo Xuân Giáp Thìn n’gor Kon Tum năm 2024 pla n’hơ,  nkoch mbơh tât nuĭh răk uĕh rlău 500 ấn phẩm báo Xuân bah bơi 80 Hội Nhà báo lam dak, nhih pah kan báo chí tâm n’hanh bah dih n’gor.

Lah ta rơh ntơm pơk, wa Y Ngọc, Groi kruanh UBND n’gor Kon Tum lah rjăp, ăp  nhih pah kan báo chí, nkoch trêng nău lư bah n’gor ndrel ntơh măt ăp nhih pah kan thông tấn, báo chí Trung ương gŭ kan ta n’gor hŏ geh âk rgâl mhe tâm trong tĭng ƀư nău dơn kan chính trị, n’hao nău gĭt blău ƀon lan, rgop uĕh  tâm nău dơi hun hao wăng sa- rêh jêng kon nuĭh bah n’gor. Groi kruanh UBND n’gor Kon Tum, ŭch rŏng ăp nhih pah kan thông tấn, báo chí, nkoch trêng nău lư nsrôih tay lơn đŏng gay njêng luh ăp nău nchih nkoch báo  chí săk tam; nkoch n’hơ, lah rjăp nău hun hao bah n’gor./.