“Tahen Biên phòng Việt Nam, Biên phòng Dak Lak-nkah 65 năm têh jêng ndrel hun hao” lah nkô̆ nau mpla n’hơ rup yor Hội VHNT Dak Lak tâm rgop đah Rđau kan tahen Biên phòng n’gor ndrel Bảo tàng Dak Lak ƀư kêng măng 1/3’.

Geh ƀư ntơm nar aơ tât lơ 15/4 tât ta Bảo tàng n’gor Dak Lak, mpla n’hơ 120 plơk rup geh tâm rgop đah ntŭk ndah rup nkoch phóng sự mpeh tahen biên phòng. Aơ lah ăp rup geh săch tă bah ăp ntŭk hăn ƀư ngăn mpeh nau nkra, ăp nau hăn kan bah biên phòng bah ăp nhà báo ndrel nŭih nklih rup, trah rup bah tahen Biên phòng Việt Nam lah nsum ndrel n’gor Dak Lak lah êng.

Bah nê mbơh, nkoch mpeh nau kan 65 năm ndâk ndrel hun hao bah Tahen Biên phòng Việt Nam, tahen Biên phòng Dak Lak, nkoch ăp nau ueh bah cán bộ, tahen biên phòng tâm rnôk ƀư nau mât đăp mpăn n’har bri, biên phòng lam ƀon lan geh nsum ma nkuăl neh bah neh dak./.