Lơ 15/2, ta xă Cư Prông, UBND nkuăl Ea Kar, n’gor Dak Lak ntơm ƀư Nar hội Văn hóa ăp rnoi nuĭh nkuăl Ea Kar rơh tal 3. Nar hội văn hóa ăp rnoi nuĭh nkuăl Ea Kar năm aơ ƀư âk nău kan kơt: njroh mprơ way ơm ăp rnoi nuĭh; tâm rlong ăp nău pâl way ơm; mpla nsơ n’hanh ngêt sa ăp nkual; uănh ƀư ngăn ăp ntŭk ntô văn hóa Tây Bắc, Tây Nguyên n’hanh văn hóa rgum lăp; hăn uănh di tích dak leng Drai Y Bar; tâm rlong thúng n’hanh duk Ka Yak;

mpla nsơ n’hanh tăch ăp ndơ ntĭt mpơl, ndơ OCOP bah nkuăl. Ndrel đah nteh chĭng bah nuĭh Êđê, nteh đàn tính mprơ then bah nuĭh Tày-Nùng, nău mprơ quan họ Bắc Ninh lah ăp nău pâl way ơm bah ăp rnoi nuĭh kơt tung còn, tâm lŭp bê, lày cỏ, đánh đu, put măt nhŭp kik. Aơ lah năm tal 3 nkuăl Ea Kar ƀư Nar hội văn hóa ăp rnoi nuĭh gưl nkuăl, mô knŭng lah ndơ sa nuih n’hâm an nuĭh ƀon lan bah nkuăl n’hanh năch ma hôm rgop mpla nsơ rup gui kon nuĭh, nău uĕh văn hóa bah ăp rnoi nuĭh.