Rgâl bah hôm ma rlong ncho rveh, năch pâl nđaih rnôk hăn tât bri mât Yok Đôn, nkuâl Buôn Đôn, n’gor Dak Lak mbra lăp tâm bri hăn uănh pâl, joi gĭt ăp  nău gŭ rêh ăp nar bah rveh, treng uănh bah ngai, tĭng groi nđôi păng ŭm, pâl tâm bri…Rveh mô hôm kât rse ruăk ta jâng mô lah dăp wơng bah dŭr kơi rdeng năch pâl nđaih. Aơ lah ăp ndơ kơl  đah ăp rveh ƀon tâm bôk nău kan pâl nđaih dêh bên đah rveh dôl dơi an ƀư ta bri mât Yok Đôn.

          Dôl hăn trong bri ta bri mât Yok Đôn, nkual xã Krông Na, nkuâl Buôn Đôn, n’gor Dak Lak, rveh me H’Blú uănh saơ pih rêp si gle sa njôm sa lĕ ma mpôl. Tĭng bah kơi rveh H’Blú, rveh me Khăm Phanh ngăch hăn bah  năp tĭng sa ăp  tơm prit hŏ ơm ndơm an ta nê. Lôch sa, păng jŭr tât bong dak me ngêt dak, ŭm bruh dak an năch uănh.

        Ăp nău kan bah 2 bôk rveh du trong dah rŏng êng, mô kâp têk kreo bah nuĭh mât  rveh. Năch hăn uănh pâl dâk ngai đăp mpăn, tĭng groi nđôi gŭ rêh bah rveh n’hanh djăt nău ntĭm nti nkoch mbơh mpeh nău mha êng, nău lư n’hanh ntơm bah rơh rđăp, mât chăm  bah ăp kon rveh. Yuh Phan Ngọc Quế Lâm, năch ta quận 11, nkual ƀon têh Hồ Chí Minh râng rlong hăn uănh nkoch:

“Saơ rveh gŭ rêh êng ta bri, păng saơ dah rŏng ri săk gâp nơm saơ nuih n’hâm uĕh aih rnôk uănh saơ dơi rup uĕh kơt nê. Rveh lah du ntil ndơ gŭ rêh êng tâm bri ma mbra gŭ tâm bri ri saơ dah rŏng lơn. Dơi nô ntĭm nti leo hăn nkoch âk  nău lư mpeh rveh dŭt uĕh n’hanh ŭch rŏng lah he dơi gĭt tay âk lơn mpeh păng”.

        Nău hăn rlong uănh dja lah tour pâl nđaih bri dak dêh bên đah rveh bri mât Yok Đôn n’hanh mpôl kan mât njrăng mpô mpa bri châu Á kan nsum ƀư bah n’gul năm 2018. Đah nău ŭch mât ndray rveh ƀon  ta Dak Lak bah năp nău ngăn geh rveh  nar lơn ma djôr ranh. Aƀaơ, geh 10 bôk rveh râng trong ntĭt leo, tâm nê geh 6 bôk rveh way mâp đah năch pâl  nđaih. Tĭng nô Phạm Xuân Quỳnh, cán bộ trong nchrăp kan mât ndray mpô mpa bri châu Á, ăp bôk rveh râng bôk nău kan hŏ dah rŏng gŭ rêh êng tâm bri, luh bah rvuăk nkông n’hanh nău klĕ kreo bah kon nuĭh. Rgâl bah hôm ma ncho kalơ dŭr rveh, năch dơi ntrŏng uănh rveh bah ngai, tĭng ŭanh păng sa, ŭm, bĭch, nta ntŭk gŭ rêh tâm bri... ma mô khuch tât nău rêh bah păng.

“Nuĭh tiăp mô kâp ndjôt kreo, mô  kâp pŭn si, dơn geh dŏng ndơ nkhôm mô lah siăm an păng sa gay rveh ŭch gân dơm. He dŏng ăp trong ƀư nê mbrơi mbrơi mbra kơl an rveh plơ̆ tay đah nău rêh êng tâm bri bah păng, păng mbra gĭt dơi păng ân joi ndơ sa ta ah ntŭk, mhâm săm bah êng nău ji, tâm mât chăm nsum mhâm  ƀư. Mbrơi mbrơi ri rveh gŭ rêh dah rŏng lơn yor n’hâm suan ngăch dăng lơn. Ndơ ngêt, ndơ sa ri di kơt moh ndơ păng ŭch geh sa. Nău geh bah rveh dơi n’hao âk lơn”.

        Tâm 6 năm aơ bri mât Yok Đôn wơt năch pâl nđaih hăn rlong uănh saơ tour pâl nđaih bri dak dêh bên đah rveh. Năm 2023, tour rlong hăn uănh pâl dja  dơi mpôl kan Kỷ lục Việt Nam mbơh lah ngoăy tâm 20 tour dŭt uĕh êng Việt Nam. Nô Y Siêm Hđơk, nuĭh ntĭm leo hăn pâl uănh bri mât Yok Đôn an lah: Nău kơp dơn dja an saơ trong ntĭt leo mô dơn nsĭt tay nău ring tam uĕh tât ntil rveh n’hanh ntŭk gŭ rêh êng tâm bri bah păng ma hôm dơi năch pâl nđaih dŭt ŭch đŏng.

          Tour rlong uănh pâl rveh dôl lah tour wăch rgum năch pâl nđaih tâm n’hanh bah dih dak dŭt ŭch, nsĭt tay rnoh khlay nuĭh n’hâm  uĕh lŏng kon nuĭh đah ăp bôk rveh. Tâm rnôk rlong ŭanh pâl rveh ri he mbra nđơn trêng tay ăp nău lư an năch pâl nđaih dêh rŏng tay đah ntil rveh”.

         Ndrel đah trong ntĭt leo pâl nđaih dêh bên đah rveh, năch pâl nđaih rnôk hăn tât bri mât Yok Đôn mbra rlong uănh saơ ăp ndơ pâl rlưn êng ƀa ƀă đŏng kơt: wah duk  ta dak  me Sêrêpôk, tê̆ ndar, cắm trại, treng n’hanh chŭp rup ăp ntil sĭm, hăn jâng tâm bri, joi gĭt ăp ntil ndơ gŭ rêh tâm bri lha paih… wa Vũ Đức Giỏi, Groi giám đốc Ntŭk rgum ntĭm nti ntŭk gŭ rêh bri dak n’hanh rhŏ dŏng, bri mât Yok Đôn an gĭt, đơn vị dôl âk ntil trong rlong uănh pâl tâm ban kơt ăp ntil ndơ ƀư gay wăch rgum năch pâl nđaih.

“Bri mât hŏ nkoch ăp tour rlong uănh saơ rveh n’gul nar mô lah lĕ ma du nar râng rlong uănh saơ ndrel rveh mô lah ăp tour pâl nđaih glêh lơn gay tâm di đah mông nar n’hanh nău geh, nău ŭch bah năch. Let năp tay ri lôch rnôk Đề án pâl nđaih ƀư lôch jêh ăp tŏng lam lĕ rngôch, bri mât Yok Đôn mbra kuăl jă ăp nuĭh ntuh kơl tâm rrgop kan wăng sa mô lah manh bri gay bu lăp ntuh kơl tâm hun hao pâl nđaih bri dak tâm trôm bri mât".

Âk ntil ndơ gŭ rêh tâm bri dak, âk ntil mpô mpa, si gle mpêt khlay, bri mât Yok Đôn lah ntŭk  geh tơm ndơ sa, dak  ngêt tâm ban kơt ăp ntŭk bri dak tâm di gay rveh ƀon ta Dak Lak bên di n’hanh plơ̆ tay đah nău rêh êng tâm bri dak. Bah nê, nta trong gay an păng dơi  mât njrăng jŏ jong, ngăch dăng n’hanh dah rŏng lơn, nkre njêng du ntil trong pâl nđaih rlong uănh saơ uĕh êng, geh êng rnôk năch hăn pâl nđaih tât Dak Lak./.