Ăp nar aơ, ƀon Ako Dhong, Nkual ƀon têh Buôn Ma Thuột âk năch pâl nđaih tâm n’gor, bah dih n’gor n’hanh nuĭh dak bah dih sĭt ƀon tơm wơt Tết. Jêh 30 năm ngai nkual ƀon têh nơm, yuh Nguyễn Kim Nguyên nuĭh gŭ dak Mỹ ndrăt yor gĭt âk nău rgâl ta ƀon tơm, n’hanh yuh ndrăt ngăn lah nău rgâl ta ƀon lan, dôl hao uĕh mhe dơi mât đŏng nău way ơm. Ngêt cà phê ta bôk jay nhih Aruk House, yuh Nguyễn Kim Nguyên gĭt saơ:

Oh lăp ta aơ oh dŭt ŭch. Ta aơ kơt lah bri dak, kơt lah uĕh ngăn... kơt lah moh ndơ geh lah ndơ nê̆.... dŭt uĕh aih.

Tâm rnôk âk nuĭh ŭch đah nău uĕh n’hanh nău blău ta Arul House ri nghệ sĩ ưu tú Vũ Lân, nuĭh geh rlău 40 năm tĭng đah nău kan mĭn njêng, mât ndrăy văn hóa Tây Nguyênm, ƀon Ako Dhong n’hanh ntŭk ntô văn hóa Arul House hôm lah ntoh lư bah wơt rgâl văn hóa. Wa an lah drăp ndơ văn hóa chĭng gông Tây Nguyên jêng lah du nău nâp nâl, ma an rêh tĭng năm khay. N’hêl na nê̆ ta Arul House n’hanh Ako Dhong an saơ lah lah ngoăy tâm âk trong hăn gay drăp ndơ văn hóa Tây Nguyên dơi nthoi tay tâm nău rêh mhe.

Mô knŭng lah mât nâm ơm khân pơng gĭt nkra tay jêng du ntŭk mhe kơt ntŭk ntô ta Arul aơ jŭm dăr dŏng ndơ ê nkra kơt ăp plung mô lah an kon mut si aơ lah dŭt âk nău gŭ âm rêh jêng kơt nău ŭch bah nuĭh ƀon lan n’hanh aƀaơ khân pơng an ta ntŭk aơ nĕ lah nău rgâl yơn rgâl tâm di. Pơng lŏch tâm di ntŭk ntô an hun hao mpeh pâl nđaih jêng ntŭk rêh an kônh wa tâm ƀon.

Arul House lah du ntŭk gŭ tâm âk rơh, bah rnăk wâl wa H’Len Niê ƀon Ako Dhong, phường Tân Lợi, nkual ƀon têh Buôn Ma Thuột. Wa H’Len, du hê bu ur ƀư lŏ mir, knŭng bên kŭk n’hanh sah, yor ntô̆ n’hao mpeh ăp đrăp ndơ bah u che, lĕ tă ndâk ƀư ntŭk gŭ bah rnăk wâl jêng du rmôt bảo tàng văn hóa Êđê n’hanh rhŏ ntŭk ngêt sa Êđê way ơm.

Gâp ŭch gâp rŏng gâp mĭn n’hanh gâp ƀư du trong ndơ geh ơm ntŭk geh gâp lah nuĭh tăch rgâl. Ndơ hôm e rnôk nĕ gâp saơ khlay văn hóa u che n’glơi an. Yor Arul lah nău nkoch bah nău rêh Len, Arul lah săk bah bơ̆ Len. Len mĭn lah gâp lah rup gui bah mê̆ bơ̆ lah du hê kon Neh Việt gâp ŭch ri gâp mô dơi ƀư m’hĭk bah me bơ̆ u che bah gâp rêh neh dak bah he n’hanh he an ƀư đah săk bah nơm tă bah pah kan jan sa n’hanh uănh n’hanh gâp ntô̆ n’hao.

Nău rŏng văn hóa Êđê, nău ŭch way ơm bah rnăk wâl, rnoi mpôl n’hanh ƀon lan, lah nuih n’hâm an H’Len Niê ndâk ƀư ntŭk ntô văn hóa Arul House. Đah nuih n’hâm săk nơm têh dăng n’hanh âk nău kơl dŭt n’hâm, nuĭh bu ur way ƀư mir ta ƀon Ako Dhong lĕ ndâk ƀư jêh Arul House geh âk nău uĕh Êđê. Yơn rnôk ngih wâl aơ ndâk ƀư jêh, H’Len Niê nsrâng đah nău dơi geh bah nơm, nĕ lah joi tơm prăk tŏng an Arul House dơi uĕh mro đah năm khay. Ndrĭ hôm yuh lĕ mâp Trần Thị Châu Phương, nuĭh blău tâm nău kan pâl nđaih ta Hội An n’hanh nkual ƀon têh Hồ Chí Minh. N’hanh aƀaơ, Trần Thị Châu Phương lah Giám đốc Arul House:

Rnôk nĕ oh wêh yơ H’Len đah du hê năch pâl nđaih dơm. Oh mĭn joi đŏng ndơ lơh du hê bu ur Êđê lŏ geh nuih n’hâm tât kơt nĕ, đah oh lah du hê năch ri oh saơ nĕ lah nău dŭt têh khlay ri oh mư hăn ndrel đah yơ H’Len. N’hêl na nê̆ oh mô hŏ dơi ƀư an Arul oh uănh saơ ta ƀon lan bu rêh du nău rêh dŭt uĕh, dŭt blău yơn mô geh nuĭh dăp tay dơm. Ta jay ăp nuĭh moh ndơ sa ăp nar way moh ndơ sa, nar lễ moh ndơ sa ri ăp băl gâm, oh knŭng lah nuĭh dăp tay an pơng ƀư uĕh lơn ndơ văn hóa lĕ geh ơm. Bah tâm kon nuĭh bâh ăp băl ri bah nĕ Arul jêng ăp nar.

Aƀaơ Arul House lĕ ngoăy tâm âk ntŭk bên đah năch tâm n’hanh bah dih dak ăp rnôk tât đah ntŭk cà phê Buôn Ma Thuột. Rnôk geh du nar n’gŭr răm bah nkual ƀon têh Buôn Ma Thuột lĕ lôch, ŭnh pôi way ơm hit ta jâng gung bah Arul house. Nteh chĭng gŭr răm, nău Ei rei n’hanh njroh xoang bah nuĭh, boăt nthoi tay nuĭh ƀon lan ƀon Ako Dhong đah năch pâl nđaih ăp ntŭk jêng du nsum mpôl.