Xã Đắk Ha, nkuăl Đăk Glong lah ngoai tâm ăp ntŭk tât tâm trong “nau ueh bah neh dak ndrel ŭnh” tâm ntŭk ndơ ơm Công viên địa chất lam ntur neh UNESCO Dak Nông. Wa K’Bang, rnoi Bunong, bu ranh blau tanh dông, sah tâm ƀon Ting Wel Đăng, xã Đắk Ha mbơh, nau kan n’gor săch ƀon lan ntŭk njưh jâng bah ndơ ơm ndrel nau rƀŏng ndâk njêng pâl n’aih nsum mpôl hŏ pơk luh hau hun hao văng sa ân kônh wa. Rnoi Bunong ta aơ mro tâm nuih n’hâm tâm rnglăp nsum ndrel hun hao pâl n’aih, ƀư nau kan:

“Nau kan ơm bah rnoi nơm ri rnôk aơ saơ geh hun hao ngăn, nkre kơl an nau dŏng, nkrel ma tăch ân bu năch bu tât pâl n’aih đŏng. Kơt lah gâp tanh kơt aơ ri bu klô tâm ƀon ri kŏ geh nau blau da dê, nkre blau nau mât prăp, nkre geh prăk đŏng”.

            Ndrel tâm ntrong tât nkuăl ơm Công viên địa chất lam ntur neh UNESCO Dak Nông, nkuăl Krông Nô lah nkuăl geh âk ntŭk ơm ueh ngăn, đah bri ueh geh nsum ma ƀon lan ăp rnoi mpôl đê̆ ta aơ hôm ơm ăp nau ueh ơm kăl e. Wa Suơ Hlong, tâm ƀon Đru, nkuăl têh Dak Mâm, nkuăl Krông Nô, rhơn ngăn rnôk păng geh deh rêh lah ngoai tâm âk nkuăl neh geh âk nau vay ơm ueh dnrel âk ntŭk bri dak ueh. Tâm nê mra dơi nkah tât leng Đray Sáp, trong yôk ŭnh ơm:

            “Gâp rhơn ngăn rnôk saơ ăp nau ueh geh ơm ơm ta aơ kơt leng Dray Sáp mô lah trong yôk ŭnh dôl geh leo lăp dŏng, ƀư ân ueh ndrel đah nau ơm tay gay ma hun hao văng sa, rêh jêng. Âk kônh wa kŏ râng ndrel ăp nau kan pâl n’aih, nau rêh jêng geh hun hao đŏng”.

            Wa Tôn Thị Ngọc Hạnh, Groi Kruanh UBND n’gor Dak Nông mbơh, n’gor geh mih, nar, si gle jêng ntŭk kan pâl n’aih ăp ntil, ueh uănh. Âk ntil leng dak ueh tâm ăp bri krong ngai kơt lah Dak Glun, Đray Sáp, Gia Long, Trinh Nữ... Vườn quốc gia Tà Đùng, nglau Tà Đùng đah bơi tât 40 gôl dak têh, jê̆ geh ntoh mhô kơt lah “Vinh Hạ Long tâm nkuăl yôk prêh”. Ngăn lah, Dak Nông geh âk nau ơm ueh, đah 40 rnoi mpôl oh nê ndrel rêh. Dĭng lĕ nê njêng du ntŭk ueh ơm êng geh Công viên địa chất lam ntur neh UNESCO Dak Nông.

            Gay ƀư ueh nau dơi, geh ơm geh nê, Nau ntrŭnh Đại hội Đảng bộ n’gor Dak Nông tal 12 uănh năl nau hun hao pâl n’aih lah ngoai tâm pe n’gâng tơm văng sa bah n’gor. Wa Tôn Thị Ngọc Hạnh, mbơh, đah ăp nau ntrŭnh, ntrong rđau kan n’hêl, tâm ăp năm rlau aơ, Dak Nông dôl ăp nhoat leo nau kan pâl n’aih hao bản đồ lam ntur neh:

            ‘Gay ân tâm ban, geh nsum đah ăp nau kan lah nau ƀư ân geh n’hêl ngăn ndrel nơm hŏ ăp nhoat dơi geh ndâk nkra nau kan, ăp ntŭk hăn geh lăp jru bah nau kan ntĭm nti, n’hao nau gĭt rbăng bah ƀon lan. Mhâm ƀư gay nŭih ƀon lan dơi gĭt, tâm rgop ngăn ndrel khân păng nê lah nau tơm gay ma mât, ƀư ân ueh, hun hao dơi ăp nau ơm ueh, ăp nhoat gay ma mât, ndâk tay, ƀư ueh, hun hao, mât ndray ăp nau vay ơm, nau ueh bah ăp rnoi mpôl. Mât nau vay ơm ƀư ăp ntil ndơ ân nau hun hao pâl n’aih ndrel hăn nsum ma nau hun hao văng sa, rêh jêng bah n’gor”.

            Tâm nau ƀư nau ueh ơm nê, ăp ntŭk ndơ ơm ueh, mih nar tâm di tâm ban lôch tâm năm, geh nsum đah ăp nau rƀŏng ntuh kơl tâm di, mpŏng ŭch tâm ăp năm ba kơi, nau pâl n’aih Dak Nông mra hun hao dăng rjăp, leo têk nau kan pâl n’aih bah năch tât tâm nkuăl neh geh âk nau ơm yau Công viên địa chất lam ntur neh UNESCO Dak Nông./.