Jay nô Siu Pốp, ƀon Mrong Ngó 2 (xă Ia Ka, nkuăl Chư Păh) âk năm aơ geh năch ƀa ƀơ lơn. Âk năch lah ăp nuĭh bên yorr ndrel râng rmôt tâm rgop mât chăm n’hanh nkret njêng cà phê tâm di 4C. Nô Siu Pốp an gĭt: trong ƀư cà phê bah nuĭh rmôt gâp lĕ lôch jêh êng bah năp. Ăp nuĭh mô knŭng wât trong mât chăm, kơl săk geh mir tơm; gĭt nkret njêng gay geh grăp cà phê rlăi uĕh ngăn ma hôm geh âk nău mbơh ntŭk tăch gay tăch ndơ tâm rnôk geh prăk. Nău aơ lĕ kơl 20 rnăk tâm rmôt hao âk nău khlay cà phê jêh pĕ n’hanh kơl Siu Pốp dơi geh ndơ rnê nkhôm nuĭh ƀon lan nkra njêng blău bah nkuăl Chư Păh. Nôi nkoch:

 “Gâp nkoch an kônh wa Jarai gâp ƀư cà phê nâp nâl. Ŭch an cà phê hun hao uĕh an ntuh kơl phân poh âk, an phân vi sinh nkre phân hóa học. Kơt nĕ, cà phê mbra nâp n’hanh têh ngăch, săk geh mbra âk lơn. He lơi dŏng ir phân hóa học âk mbra ƀư dăng neh blak neh; dŏng phân vi sinh âk, tơm cà phê mbra uĕh nđĭr n’hanh đêt tu ndrŭng. Săk geh mbra âk n’hanh mât an ăp năm. Mpŏng m’hâm ƀư, pơng rgâl trong mât chăm cà phê, ăp năm tât mbra săk geh âk lơn”.

Nô Siu Pốp tâm mir cà phê nkra njêng tĭn di 4C bah rnăk wâl nơm.

Tâm sam ƀŭt nchih dơi UBND n’gor Gia Lai rnê, nkhôm năm 2022, yuh Rơ Com H’Sao, adeh năm 1985, ƀon Blang 1, xă Ia Dêr, nkuăl Ia Grai lah nuĭh ƀon lan nkra njêng blău tĭng du trong êng, nĕ lah tâm rgop uĕh đah tuch tăm đah nkret njêng n’hanh tăch ndơ. Yuh H’Sao an gĭt, kơt âk kônh wa nuĭh Jrai ta ƀon Blang, bah năp đaơ yuh hăn manh prăk, tăm cà phê, mât sŭr. Năm dơh ri prăk dŏng mô lĕ, yơn năm jêr jŏt ri sŏk mô tŏng dŏng. Ăp nău kan lĕ rgâl bah rnôk yuh janh rwăt măy kĭn ba, pơk ntŭk tăch ndơ sa mât rong n’hanh phân poh.

“Bôk năp, mpôl hên mô geh prăk âk. Yơn mĭn n’hanh ƀư tĭng dŭt n’hâm nơm. Tât aƀaơ, geh âk săk rnglăy răm rhơn đŏng. Geh oh yuh, me bơ̆ kơl du hê du đêt, dŭt âk nuĭh tâm jay kơl gay geh prăk ntuh kơl. Bah nĕ, gâp dơi kơl oh nô, khân pơng geh ƀư sa n’hanh geh prăk đăp mpăn. Dŭt mpŏng năm tât geh âk oh yuh êng nsrôihdŭt n’hâm ƀư kan gay nsĭt tay drăp ndơ an rnăk wâl”.

Yuh H’Sao nuĭh ƀon lan nkrav njêng blău bah nkuăl Ia Grai, dơi UBND n’gor Gia Lai an bằng khen năm 2022

Tĭng wa Phạm Nhuần-Groi Kruanh Hội nông dân n’gor Gia Lai, bah năm 2017 tât 2022, rĭng du năm, hội nông dân ăp gưl ta n’gor Gia Lai kơp dơn rlău 62.000 nuĭh ƀon lan nkra njêng blău. Aơ lah ăp nuĭh kơl hăn lor nkra njêng, tâm rlong tâm lŏ mir dơi rêng hvi ta nkual ƀon lan đah nău rgâl trong ƀư tuch tăm, rgâl tơm tăm mpa rong; mbơh ƀư ăp ntrong kan nkra njêng tăch rgâl săk rnglăy. Bah nĕ, rgop mông nar tâm rlong n’gŭr răm, ntrŭt đă nuĭh ƀon lan ndrel rlet rlău, hao ƀư ndrŏng. Wa Nhuần an gĭt, tâm lvang aƀaơ, nuĭh ƀon lan gĭt blău an gĭt n’ăp kỹ thuật nkra njêng n’hanh nău mbơh ntŭk tăch, kơt dŏng du đêt săk rnglăy công nghệ mrô ri mhe dơi râng jru hvi trong khlay ndơ lŏ mĭr. Yor rĭ, Hội nông dân ăp gưl ta n’gor dôl geh âk nău ƀư ngăn, hăn ndrel nău hun hao bah ƀon lan n’gor:

“Ăp năm, hội nông dân hăn uănh nău ŭch bah kônh wa. Ăp nău ŭch đah nkra njêng, tăch ndơ lŏ mir. Nău ndâk njêng ndơ, nkoch mbơh ndơ, tâm rgop tăch ndơ,.... Aƀaơ, nuĭh tâm rmôt geh nău ŭch dŭt âk. Mpôl hên tŏng ăp nău ŭch, jă ăp nuĭh mbơh tơih kan ndrel geh nău blău ơm gay nkoch trêng, tâm pă”.

Du năm, n’gor Gia Lai geh hang rbăn nuĭh ƀon lan nkra njêng blău, lah nuĭh an hăn ndrel đah nău kan lŏ mir ta ntŭk rgâl tĭng trong khlay n’hanh hao tât ăp ntŭk tăch têh

Đah nău nsrôih mô ŭch ach o, ji ngot, hun hao êng ƀư ndrŏng, hang rbăn nuĭh ƀon lan Gia Lai dôl mô rlu nsrôih, nti nsơm, rgop ndâk njêng Gia Lai nar lơ hun hao, rgâl mhe./.