Ƀon lan kan lŏ mir ta nkuăl Phú Thiện, n’gor Gia Lai dôl tâm rdâng đah nău roh hoach têh bâh rnoh tăch bum jur thuk, âk ƀon lan kan lŏ mir roh dơm. Yan aơ, wa Lê Thị Xuân, xã Cư A Thai, nkuăl Phú Thiện, n’gor Gia Lai lĕ geh tăm 2 ha bum đah rnoh prăk ntuh kơl bơi tât 200 rkeh prăk. Mhe aơ, rnăk vâl lĕ rôk bum, geh klâp ma bơi tât 40 tấn bum, yơn rnoh tăch kanŭng 3 rbăn prăk/kg, jêng roh hoach tât rhiăng rkeh prăk. wa Xuân an lah, jêr jŏt aơ lah yor geh âk nuĭh tâm rlong tăch bum prum.

 “Rnoh neh hvi, rnoh tăch rĭ mô geh khlăy kơt ăp năm, tăch mô geh nuĭh rvăt, rnoh tăch năm aơ mô geh kơt năm e, hŭch dŭt âk lah yor rnoh bum dŭt âk. Nuĭh ƀon lan tăch rvăt rĭ săch bum ueh mơ rvăt, hôm lah mô ueh bu nsâm thuk ngăn”.

Bâh bôk yan tât aƀaơ, rnoh bum prum jur thuk, na nê̆, bâh rnoh 10 rbăn prăk/kg, rnoh jur thuk mbrô hôm 3.500 prăk/kg aƀaơ. Rnoh tăch thuk, doanh nghiêưj rvăt mô âk jêng ƀư an ƀon lan dŭt jêr. Nô Nguyễn Đình Thái, gŭ kan ta xã Chư A Thai, nkuăl Phú Thiện, an gĭt, đah rnoh tăch kơt aƀaơ, mir tơm bum bâh rnăk vâl tăch roh tât rhiăng rkeh prăk.

 “ Rđil đah ăp năm rĭ năm aơ ƀư dum 1 ha roh dơm bâh 20 rkeh tât 30 rkeh prăk. Aƀaơ ta 5ha rĭ dôl geh 1ha, aƀaơ hôm nha kâp rnoh khlay mhe, kâp ƀon lan rgum tay rĭ mơ khlay du đê̆, lah mô khlăy rĭ mbra hôm nha rôk lĕ đŏng lôch nĕ gay ma tăm ba”.

Tâm ban kơt nĕ đŏng đah wa Lê Thị Xuân n’hanh nô Nguyễn Đình Thái, rhiăng rnăk vâl êng ta nkuăl Phú Thiện, n’gor Gia Lai lĕ dôl dâk gâng yor rnoh tăch bum thuk ir. Geh rnăk hôm roh dơm lĕ ma mir tơm bum yor bu tuh. Wa Nguyễn Thị Thủy, xã Chư A Thai, nkuăl Phú Thiện, n’gor Gia Lai ngơi.

“Rđil đah ăp năm rĭ năm aơ ntŭk tăch rvăt năm aơ ƀư âk lơn đah năm e, ƀon lan ƀư năm aơ poh dak si jêng lah mô geh rmiăt chuh âk, âk rnăk ƀư rli rôk lĕ ma mir tơm mô geh du bum đŏng, roh dơm âk ngăn”.

Nkuăl Phú Thiện lah nkual tăm bum prŭm dŭt têh ta n’gor Gia Lai. Yan aơ, lam nkuăl tăm 3.500ha, hao bơi tât rlău pe tơ̆ đah yan năm 2022-2023, rnoh geh klâp ma 68.800 tấn. Tât rnôk aơ, bum prŭm lĕ rôk klâp ma 60% rnoh neh, hôm e nchrăp tât 30/4 mbra rôk lĕ. Ta năp nĕ, n’gâng kan têh lĕ mbơh ƀon lan kan lŏ mir rnôk pơk hvi nău pah kan tuch tăm, an geh ƀư ndrel đah doanh nghiệp ntuh kơl, tăch rvăt ndơ. Rnoh neh tăm hvi yơn mô geh ntŭk tăch ndơ geh tăm ƀư an nuĭh ƀon lan tuch tăm roh dơm rnôk tât yan pĕ rôk ndơ tăm. Wa Bùi Trọng Thành, kruanh ntŭk kan tuch tăm mât rong n’hanh hun hao ƀon lan nkuăl Phú Thiện, n’gor Gia Lai an gĭt, ta năp nău jêr ta ntŭk tăch rgâl, nkuăl mbơh tơih ăp trong kan tâm rgop tăch rvăt gay ma kơl an ƀon lan.

“Ta năp nău nĕ mpôl hên lĕ kuăl đă ăp doanh nghiệp tâm rgop njuêng ăp nău dơh nơih an nău tăch rvăt đah rnoh ndơ khlăy âk, nkre lah ntĭm đă ăp xã an geh njêng ăp nău ntuh kơl tơm gay ma ăp doanh nghiệp rvăt dơh ngăn, mât đăp mpăn tâm di rơh”.

Mhe nơh, tập đoàn Central Retail Việt Nam an gĭt ăp ntŭk kan siêu thị bâh tập đoàn aơ dôl geh mbơh tơih tăch rnoh bum mô geh lơi, hăn ndrel đah ƀon lan kan lŏ mir. Tĭng nău mbơh bâh tập đoàn aơ, nău pah kan geh mbơh tơih rnôk geh gĭt nău mbơh rnoh khlăy bum prŭm Tây Nguyên lăp ta yan tơm dôl jur thuk bâh 10 rbăn prăk/kg hôm 3.500 prăk/kg, nuĭh tăm bum roh dơm dŭt âk. Dơi gĭt, bôk nău kan hăn ndrel đah ƀon lan kan lŏ mir bâh Gia Lai bâh Central Retail Việt Nam mbra ndơ̆ bum prŭm bâh ƀon lan n’gor aơ lăp ta ăp ntŭk siêu thị GO! BigC n’hanh Tops Market. Bum prŭm mbra geh rvăt n’hanh ăp siêu thị tăch đah rnoh mô lơi lah 9.900 prăk/kg ta ăp ntŭk tăch ndơ ta miền Trung, mpeh Nam n’hanh 10.900 prăk/.kg ta ăp ntŭk tăch ndơ mpeh Bắc. Tâm pơh bôk năp dŏng bôk nău kan aơ, ăp siêu thị mbra tăch rvăt klâp ma 8-100 tấn bum prŭm bâh ƀon lan kan lŏ mir Gia Lai.